Fermandarê Qerargehê Merkezê Pawitişê Şarî Murat Karayilanî hêrişê îşxalî yê dewleta tirke û xoverdayîşê gerîlayan Radyoyê Dengê Welatî rê ercnayî.

Karayilanî verî 1ê Gulane Roşanê Karkeran û Roşanê Remezanî fîraz kerd û şexsê Mehmet Karasungur,Îbrahîm Bîlgîn, Azad Sîser û Çekdar Amedî de şehîdê menga gulane yad kerdî. 

Qiseykerdişê Karayilanî ra beşêk wina yo:

''Embazanê ma Mehmet Karasungur û Îbrahîm Bîlgînî 39 serrî verî seba awankerdişê yewîya neteweyîye xîret kerd. Ma reyna veng danê ke ganî her kes seba ney mesuldarî û erkê xo bîyaro ca. Ma do heta peynî perwerê şehîdanê xo bibê.

Îqtîdarê AKP-MHPyî û dewleta tirke PKKyî verê armancanê xo de sey astengî vînenê coka 7 serrî yo bêmabên hêrişê ma kenê. Şerî pê girankerdişê tecrîdî dest pêkerd. Hetê bînî ra vera şarê ma, gerîlayan hêrişê pîlî ameyî kerdene. Dima ke îqtîdar Garê de bin kewt sey emserî hêrişê Herêmanê Pawitişî yê Medya kerd. Xora emser serra înan a peyên a. Eke ê ser bikewê îqtîdarê înan do bibo mende. La eke ser nêkewê do çin bibê. Coka no şer şerê mendiş-mergî yo. Eke îqtîdar ser bikewo pêro destkewteyanê kurdan çin bikero û polîtîkaya qirkerdişî bîyaro ca. Şerê Zap û Avaşînî şero neteweyî yo, no şer ameyoxê şarê ma û şarê herême do eşkera bikero.

Operasyono îşxalî yo peyên operasyonanê bînan ra zaf cîya yo. Par dişmen teng bi, emser zî pê tay vurnayîşan keno ke ser bikewo. Dişmen nê operasyonî de hîna zaf teknîkî şuxilneno û hetê hêzanê mîyanneteweyîyan ra hîna zaf paştdayîş gêno. Narey xeta îxanetî ya kurdan hîna zaf aktîf a. Înan bi nimitkî sozî dayî PDKyî, PDKyî zî seba dişmenî amadekarîye kerde. Dişmen do hesabê ney bido û Zap de bin bikewo. Vakur de zî xeta îxanetî ya qoricîyan tewra operasyonî bena. Reyna cergê Sûrîye û tirkmenî zî nê operasyonî de cagênê. Hetê bînî ra dewlete wazena pê hêrişanê kîmyewîyan netîce bigêra. 

A raşte operasyonî 14ê nîsane de dest pêkerd. 17ê nîsane de helîkopteran leşkerî ardî war. La leşkerî raştê xoverdayîşê gerîlayan ameyî. Gerîlayan Zap û Avaşîn de bi fedkarî derbî dayî înan ro. Embazanê ma 5-6 rojan de verê dişmenî girewt û şer kerd. Raşto dişmen tay cayan de eşka leşkeranê xo bîyaro war. La nê leşkerî zî nika mîsal Kur Jahroyî, Şêladizê de teng bîyê. Nê şerê 15 rojan de gerîlayan serkewtişêko pîl vist xo dest. Ma do Zap bikerê kelaya serkewtiş û xoverdayîşî. Bi nê hawayî ma do dişmenî ra qesasî bigêrê.

Dişmen heta nika qet nêeşka bikewo mîyanê çeperan, eşkerayîyê Wezîrê Şerî yê dewlete raşt nîyê. Zaf kişteyê înan est ê. Goreyê doneyanê ma 300 kişteyê înan est ê. Erdogan û Bahçelî mergê bi hezaran ciwanan girewtî xo ver. Ê domananê Tirkîya benê verê mergî. 

Dişmen nika ten bîyo la bara embazan zî sivik nîya. Ganî ma paştî bidê çêranê Zapî. Şarê ma, embazê ma, her kes wa rolê xo bîyaro ca. Nê şerê neteweyî de destê kamî ra çi yeno wa bikero. Ma nasnameyanê şehîdanê xo key zelal bê danê. Ma çîyêkî nênimnenê. Wa dinya bizana ke ma senî bedelan danê. 

Gerîlayanê azadîye yê Kurdîstanî hunerê xo yê şerî de xo resna xorinîyêka pîle. Gerîlayî pê îdeolojî û felsefeya Rayberîye têgêrenê. Taktîkê neweyî yê gerîlayan zî zengîn ê. Embazî bi metodanê profesyonelan şer kenê. Hetê bînî ra embazanê ma Avaşîn, Zap, Metîna, Zendûra, Mamreşo, Girêsor, Werxelê de tecrubeyê pîlî vistî destî. Nika embazî netîceya nê tecrubeyan de xo ver danê.

Dişmen nika vera embazanê ma çeka kîmyewîye xebitneno. Dewlete ça de na çeke bixebitna ne leşkerî ne zî şar eşkenê tede bimanê, remenê.  Ganî ma vera ney wurzê we. Xoverdayîşê gerîlayan, çêrîya înan û metodê înan bingeyê serkewtişî yê. Dişmen tewr zaf pê hêzê xo yê teknîkî bawer keno. Ma na dewa de heqdar ê, ma seba estbîyayîş, ziwan û neteweya xo şer kenê. Felsefeya Rayber Apoyî û şehîdê ma çimeyê ma yê hêzî yê. Ma perspektîfê şerê şarî yê şorişgêrî ra bawer kenê. Serkewtiş do ê gerîlayan bibo.  Tîmê hereketînî yê gerîlayan xo pawenê û şer kenê. Rolê înan girîng ê. Înan çalakîyê serkewyeyî kerdî. Yanî gerîlayî bi rayîr û metodanê neweyan şer kenê. 

Bara embazan giran a, hayîya ma pê naye est a. Labelê ganî embazî bizanê ke bi rolê tarîxî têbigêrê. Coka bi sebr, aqil û planî têgêrenê. Embazî eşkenê esasê stratejîya bingeyîye ser o dişmenî çin bikerê, stratejîya şorişî bîyarê ca.''