Endamê Komîteya Rayberdişî ya PKKyî Murat Karayilanî Bernameyê Taybetî yê Stêrk TVyî de qisey kerd û mesajê xo yê seba Hemleya 15ê Tebaxe da. Karayilanî mesajê xo de verî şehîdê têkoşînê azadîye şexsê Fermandar Egîdî de û şexê Rêzan Cawîdî de zî şehîdê menga tebaxe yad kerdî û nê vatî:

''Embazê ercîyayeyî, şarê ma yo rêzdar!

Hemleya 15ê Tebaxe mîladêk a ke herikîyayîşê tarîxî vurnayo. Na hemle 38 serrî xo pey de verdayî. Hemleya ma cara 9 serranê verênan de ser kewte; polîtîkayê dewleta tirke pûç kerdî û dewaya kurdan viste rojdem. Coka Rayber Apoyî 1993 de adirbirnayîş îlan kerd. La dewleta tirke seba ke nêwaşt îradeyê kurdan bişinasna şer hema zî dewam keno.

Heta nika dewleta tirke dir di reyî prosesê dîyalogî yê dergî ameyî kerdene. Nînan ra yew Oslo de bi, oyo bîn zî Îmrali de bi. Protokolê Osloyî hetê hukmatê AKP-MHPyî ra ame redkerdene. Protokolê Îmraliyî de ma pêkerd. La dima proses hetê AKP-MHPyî ra ame rojnayene û dewleta tirke vera ma şer da destpêkerdene. Yanî înan verî hêrişê ma kerd. Ê nêwazenê meseleya kurdan bi demokrasî bêra çareserkerdene. Dewaya kurdan raştîyêk û meseleyêka komelkî ya. Dewleta tirke hêrişê Îmraliyî, şarê ma û têgêrayîşê ma kena.  7 serrî yo vera gerîlayan hêrişê giranî yenê kerdene. Nê şerî de îqtîdarê AKP-MHPyî pêro îmkanê xo vistî dewre la netîceyêke nêviste destî. Nika îqtîdar verê rijîyayîşî de yo.

Erdogan keno ke pê destekê NATO, Rûsya û PDKyî netîce bigêro. Ma venga nê hêzan danê ke mebê şirîkê faşîzmê AKP-MHPyî û qirkerdişê kurdan. Dewleta tirke vera kurdan cerganê DAÎŞ, El Qaîde, Îhvan-i Muslîmîn û cerganê Sûrîye zî şuxilnena. Ma vera rejîmêkê winasênî şer kenê. No rejîm pêro şaran rê tehlukeyêko pîl o.

Embazê ercîyayeyî;

Seke şima zî zanenê dewleta tirke 4 serran o, bi taybetî 2 serranê peyênan o kena ke Başûrê Kurdîstanî îşxal bikera. La artêşa îşxalkere Zap, Metîna û Avaşîn de teng bîya. Dewlete hedef kerdêne ke di serran de ser bikewa, îşxalê xo temam bikera la nêeşkaya hedefê xo bîyara ca. Na dewlete seba ke ser bikewa pêro metodanê bêexlaqan ana ca, çekanê qedexekerdeyan şuxilnena. La gerîlayê azadîye bi ruhê Egîd û Zîlanan, xeta temsîlkarîya 15ê Tebaxe û 14ê Temmuze de şerêkê tarîxîyî kenê. Gerîlayî bi ruhê xo yê temsîlîyetî, bi performanê xo yê şerî û bi xorinîya taktîkanê xo eşkena vera pêro hêriş, çekan û teknolojî xo ver bidê. Zap, Avaşîn û Metîna de îsbatê ney eşkera yo. Ma hê propaganda nêkenê raştîyan anê ziwan.

Embazê ercîyayeyî, welatperwerê rûmetênî;

Dewleta tirke sîyasetmedaranê kurdan, xebatkaranê sîyasetê Kurdîstanî sey terorîstî mojnena. Heyf ke hêzê mîyanneteweyî zî ney tesdîq kenê. Coka dewleta tirke şerê vera ma de pêro krîteran binpay kena. Esas de dewleta tirke Behdînan de bin kewta la kena ke pê çekanê kîmyewîyan, bombayanê nukleran ê taktikan ney binimna.

Kombîyayîşê Tehranî ra dima zî dewleta tirke bi hawayêkê zelalî vera Rojawanî şer îlan kerd. Dewleta tirke Rojawan de şarê erebî, kurdî, asûrî kena hedef, qirkerdişan kena û wazena serkêşanê şarê ma tasfîye bikera. Ez şexsê Rêzan Cawîd, Ferhad Şiblî û Jiyan Tolhildan de pêro şehîdanê nê hêrişan yad kena. Dewleta tirke çar parçeyanê Kurdîstanî de hêrişê şarê ma kena, wazena têgêrayîşê ma tasfîye bikera, bi nê hawayî serrgêra 100. ya Lozanî de qirkerdişê kurdan temam bikera û Peymana Lozanî zî hîna hîra bikera.

La têkoşînê ma bingeyê rijîyayîşê înan awan kerdo. Ma prosesêkê neweyî de yê ke îstîsnayî yo. Ganî pêro welatperwerî hişyar binê, fedakarî bikerê. Sere de ciwanê kurdî wa pêro kesî ganî erkê xo bîyarê ca, têkoşînê azadîye brz bikerê. Ma sey şarî eke pê xo bawer bibê, ma serê bingeyê stratejîya Şerê Şarî yê Şorişgêrî de têbigêrê, ma eşkenê emser bikerê serra fînalî. Ganî ma xo vîr a nêkerê ke nê dewrî de çi Rojawan, çi Başûr, çi Vakur eke ma sey şarê Kurdîstanî hêrişanê dewleta tirke nêvindarnê ma nêeşkenê Rojhelatê Mîyanênî de bibê wayîrê îradeyî. Coka girîng o ke ma vera nê hêrişan yewîya neteweyîye awan bikerê. Eke ma rêxistinîya xo aver berê, bibê yew û taktîkanê afernayoxan bişuxilnê ma do bêguman ser bikewê.

Embazê ercîyayeyî, welatperwerê rûmetênî;

Ma eşkenê na serre bikerê serra fînalî. Seba ney ganî ma pê xo bawer bibê û fedakarîya lazime bikerê. Ma pê bawer ê ke eke ma pê xo bawer binê û nê bingeyî ser o têkoşîn bikerê do ser bikewê. Nê esasî ser o ma wazenê serra 39. ya Hemleya 15ê Tebaxe bikerê serrêka pîle, serrêka fînale. Seba ney ma venga pêro şaranê Kurdîstanî danê ke bi xurtî beşdarê nê têkoşînî bibê. Eke wina bibo rayraşîyayîşê azadîye serra xo ya 39. de do qetî ser bikewo.

Bi hêvî û bawerîye ez reyna Roşanê Gandarbîyayîşî fîraz kena.''