Hemserekîya Konseya Rayberdişî ya KCKyî derheqê hêrişê bi SÎHAyan ê dewleta tirke yê vera Şingalî de eşkerayîyêke daye.

Eşkerayîye wina ya:

''Dewleta tirke ya kolonyalîste-qirkere qirkerdişêko bîn kerd. Vera Hemserekê Konseya Rayberdişî ya Îdareyê Xoserî yê Şingalî Merwan Bedelî pê SÎHAyan hêriş ame kerdene. Bedel ame qetilkerdene la domanê ci weş û war xelisîyayî. Êyê ke no qirkerdiş kerd qetî rojêke do hesab bidê. Ma do xeyalê Bedelî û şarê êzidîyî; Êzidxanê Azadî qetî do bîyarê ca.

Merwan Bedel rayberanê şarê êzidîyan ra yew bi. O rayberêko winasên bi ke wexto ke DAÎŞî qirkerdiş kerdêne gerîlayan reyde mil bi mil şer kerd û êzidîyî koyanê Şingalî de rêxistin kerdî. Ma nê xoverdayoxê pîlî bi minet û hûrmetî yad kenê û şarê êzidîyan rê serweşîye wazenê. Ma reyna îfade kenê ke sey Têgêrayîşê Azadîye hertim do hetê şarê êzidîyan de bibê.

No hêriş hetê dewleta tirke ra ameyo kerdene la kesanê ke Parastinî Şingal de rêxistin kerdî îstîxbaratê nê hêrişî dayî. MÎTî rê yanî dewleta tirke rê nê kesan agahîye daye. Xora îdarekarê PDKyî pê eşkerayîyanê xo, medyaya PDKyî pê xeberan û bernameyanê xo êzidîyanê Şingalî kenê hedef û nê hêrişan zî meşrû kenê. Têna êzidîyî nê pêro kurdî na raştîye vînenê. PDK ganî herêmanê ke tede hukmê ci çin o sey hedefî nêmojno dewleta tirke.

Rayberanê êzidîyanê ke Şingal de ameyê qirkerdene, vera DAÎŞî xo verdabi, binkewtişê DAÎŞî de rolêko pîl kay kerdbi. Coka Merwan Bedel, Saît Hesen, Zerdeşt Şengalî fermandarê şarê êzidîyan ê. Embazê Derweşê Avdêyî yê. Ê şehîdê xoverdayîşê vera DAÎŞî yê. Dewleta tirke nê xoverdayoxan ra qesas gêna. PDK zî pê polîtîka, tewir û vateyanê xo nê hêrişan meşrû keno û beno hemkarê nê hêrişanê qesasî.

Qirkerdişanê tewr pîlan ê sesera 21 ra yew zî Qirkerdişê Êzidîyanê Şingalî bi. Hema zî bi hezaran kêna û cinîyê êzidîyî destê DAÎŞî de yê. Iraq û PDKyî reyde dewletê ke Rojhelatê Mîyanênî de hetê sîyasî û leşkerî ra wayîrê hêzî yê na rewşa Şingalî ra mesuldar ê. Dewleta tirke ya ke mutefîqê DAÎŞî yo, hemkarê nê sûcê qirkerdişî yo. Hemkarîya dewleta tirke û DAÎŞî  do zêdêr ameyox de eşkera biba. Xora agahîyê winasênî destê dewletan de estê. Eke DAÎŞo ke êzidîyî qir kerdî mehkemeya mîyanneteweyîye de bêrê muhakemekerdene na raştîye yew bi yew eşkera bena.

Dewleta tirke pê nê hêrişan wazena hêrişanê qirkerdişî yê DAÎŞî temam bikera. Beno ke PDK vano qey eke êzidîyî bêrê eciqnayene raştîya ke înan êzidîyî qirkerdişî de têrî verdayê do bêra nimnayene. Naye ra ber tewirê PDKyî îzah nêbeno. Ma çimî de PDK şaşîyêka tewr pîle ya tarîxê xo vera êzidîyan kena. La eke êzidîyî xoser  bibê û PDK zî ney qebul bikerê rewşa ke 3ê tebaxa 2014î de qewimîyaya telafî bena.

Êzidîyê ke qirkerdişanê Şingalî de îstîxbarat dayo, tarîxê êzidîyan de tim pê xîyanetî do bêrê vîrardene. Kurdîstan de nê kesan rê 'tirşikçî' vajîyeno. Tirşikçîyê nikayênî zî seba çend madeyanê werdî ney kenê. Ganî êzidîyî nê kesan mîyanê xo ra vejê û bikerê ke nê kesî mîyanê komelî de biciwîyê. Kesê winasênî erdê êzidîyan de ciwîyayîşî heq nêkenê.

Ganî êzidîyî Mam Zekî, Mam Beşîr, Seîd Hesen, Zerdeşt Şengalî û Merwan Bedelî xo vîr a mekerê. Ganî wayîrê dewa û armancanê înan vejîyê. Eke Merwanêk şehîd bibo zî bi desan û seyan Merwanî herinda ey do bigêrê. Azadîye bi rehetî nêkewena destî. Seba ke reyna ferman nêbo ganî Êzidxano azad û xoser ronîyo. O çax hînî peynîya fermanan do bêra, êzidîyî hînî do sey bawerîyanê tewr kahanan ê tarîxîyan nasname û kulturê Rojhelatê Mîyanênî zêde bikerê.

Seba vîrameyîşê ê kesanê ke hetê DAÎŞî ra ameyî qetilkerdene, remnayene û şehîdkerdene tek cewabo raşt ganî azadî û xoserîya êzidîyan bibo. No hînî hesreta pêro êzidîyan a. Gelo kamyew êzidîyî ney nêwazenê? Eke wayîrê Êzidxanê xoser û azadî nêrê vejîyayene sebebê ney ya teda ya yan zî menfaatê erzanî yê.

Sey Têgêrayîşê Azadîye yê Kurdîstanî ma venga êzidîyan danê ke seba hesreta Merwan Bedelî û şehîdanê pêroyînan, seba caardişê Êzidxanê xoser û azadî têkoşîn pîl bikerê. Wexto ke êzidîyî wayîrê Êzidxanê xoser û azadî vejîyenê, qet yew hêz nêeşkeno verê ameyoxê Êzidxanî bigêro û xoserîye asteng bikero.''