Konseya Perwedeyî ya KCKyî derheqê çalakîyanê protestoyî yê wendekaranê Başûrê Kurdîstanî de eşkerayîyêke daye.

Eşkerayîye wina ya:

''Ma sey Konseya Perwerdeyî wendekaranê zanîngehî yê Başûrê Kurdîstanî selam kenê ke 21ê teşrîna peyêne ra nata seba waştişanê xo yê meşrûyan meydanan kenê de, rixmê hêriş û tedayan zî waştişanê xo ra fek vera nêdanê.

Sey pêro parçeyanê Kurdîstanî şarê Başûrî zî vera hêrişanê qirkerdişî, ziwan û kulturî bedelê pîlî dayî û qetî wayîrvejîyayîşê ziwan û kulturê xo ra fek vera nêda. Coka heqê ziwanê dayîke destkewteyêko pîl û mende yê Başûrî yo. Semedo ke no destkewte bêro pawitene û averberdene ganî pêro astengîyê vera perwerdeyî bêrê wedaritene û warê perwerdeyî mebo cayê lajî yê partîyanê sîyasîyan.

21ê teşrîna peyêne ra nata wendekarî semedo ke bursî bêrê dayene, şertê nêweşî yê wargehan bêrê weşkerdene û bi taybetî zanîngehan de nêzdîbîyayîşo têdûşt bêro caardene Ranya, Koy, Halebpçe, Hewlêr, Qeladizê, Silêmanî, Kifrî, Seyîd Sadiq û xeylêk cayan de çalakîyanê protestoyan kenê. Herinda ke hûrmet bêro mojnayene nê çalakîyan ciwanî raştê hêrişan ameyî û ameyî destbendkerdene.

Sere de selahîyetdarê Başûrê Kurdîstanî ganî Wezîrîya Perwerdeyî, Wezîrîya Ekonomî bivînê ke nê çalakîyî 'Serewedaritişêko Qerardar ê Wendekaran' o, waştişê wendekaran meşrû û hqdar ê û coka ê zî wezîfeyê xo bikerê; şertanê wendekaran weş bikerê.

Wa bizanîyo ke peygoşkerdişê çalakîyan û bêvengîya vera waştişanê meşrûyan do nêeşkê ciwananê kurdanê ke wayîrê mîrasê têkoşînî yê vindarnê yan zî serê kerdişanê neheqan bigêrê.

Naye ra ma venga pêro dezgehan danê ke selahîyetanê ke şarê ma dayo înan seba menfaatanê şarî bişucilnê û cade waştişanê wendekaran bîyarê ca. Ma visnenê înan vîrî ke no hem wezîfeyê înan o û hem zî seba înan yew mejbûrîyet o.''