Hemserekîya Konseya Rayberdişî ya KCKyî derheqê qerarê Komîteya Wezîran a Konseya Ewropa de eşkerayîyêke daye û nê vatî:

''Komîteya Wezîran a Konseya Ewropa erey bo zî qerarê binpaykerdişî yê derheqê cezaya muebetê giranî de gerar girewt û vat no goreyê normanê huqûqê ceza yê Konseya Ewropa nîyo. Tirkîya verî zî ameybî hîşyarkerdene. Nika yewna serre wext da Tirkîya.  Gama ke babete bane kurdî Ewropa zî qanûnanê xo nêana ca. Ma reyna dî ke Ewropa ke qala demokrasî û huqûqî kena derheqê kurdan de sist têgêrena. Rixmo ke qerarê Konseya Ewropa zaf kewt erey û kêm o ganî sero bêro vindertene. Beno ke ameyox de netîceyê ci yê hole bibê.  Senî ke badê qerarê îdamê Rayber Apoyî Tirkîya de îdam ame wedaritene, wedaritişê tecrîdê giranî zî do bi têkoşînê azadîye yê seba Rayber Apoyî bibo. Xeyrê têkoşînê kurdan û dostanê înan Komîteya Wezîran no qerar girewt.

23 serrî yo Îmrali de goreyê yew kesî qanûnî yenê caardene. Têna na raştîye zî zulmê Îmraliyî ramojneno. Seba ke Rayber Apoyî zanayîşê azadîye şarê kurdî rê musna tira qesas genê.  Coka cezaya muebetê giranî ke qet cayêkê dinya de çîn a ameye îcatkerdene. Na zî Tirkîya ke endama Konseya Ewropa ya kerde. Hem zî rixmo ke normê huqûqî yê Ewropa naye qebul nêkenê ame kerdene. Bêşik seba ke karê welatanê Ewropa Tirkîya ra esto wina bêhuqûqîye yena kerdene.  Berpirsîyaranê verênan ê tecrîdî ra yew Konseya Ewropa ya.  Roja verêne ra na bêhuqûqîye vînenê. CPTyo ke dezgehê Konseya Ewropa yo 3 serrî verê cu vat tecrîd îşkenceyo û waşt wa bêro wedaritene la Tirkîya ke tewirê oporrtunistî yê Ewropa zana qerar nêard ca. Konseya Ewropa rixmê raporê CPTyî badê hîrê serran hema newe qerarî gena dest û qeraro ke ame girwtene hetê kurdan û dostanê înan ra kêm yeno vînayene.  Rixmê kêmayîya qerarî ganî qerar bêro teqîpkerdene, ser o bêro vindertene ke têna qale de memano bêro caardene. Beno ke no qerar bibo gamêka wedaritişê cezaya muebetê giranî û verê tecrîdî bîgiro.

Serra 2021yî têkoşînê vera tecrîdî û semedê  azadîya fîzîkîye ya Rayber Apoyî zafhetin vila bi û resa merheleya muhîme. Azadîya Rayber Apoyî kewte rojdemê hêzanê demokrasîyî yê dinya û netîceya nê têkoşînî de qerarê Komîteya Wezîran qerar girewt. Serra 24ê komployî de beno ke semedê azadîya Rayber Apoyî netîceyê muhîmî berê destfînayene. Xora şarê ma dostê kurdanî  û hêzê demokrasîyî vanê e wextê azadîye ya ey ameya. Pîya bi têkoşînê şarî ganî têkoşînê huqûqî zî bêro kerdene. Qerarê Komîteya Wezîran netîceya têkoşînê huqûqî û şarî de ame girewtene.  Coka ganî têkoşînê semedê azadîya Rayber Apoyî her hetî ra bêro pîlkerdene. Dewleta tirke pê têkoşînê zafhetinî ameya nuqtaya rijnayîşî. Eke bero ramojnayene ke senî dewleta bêadalet û bêhuqûq a meşruyetê ci qedîyeno û yena rijnayene. Ma heme hêzanê demokrasîyî yê ke azadîye kurdan û Rayber Apoyî nêzdî kenê , ma înan selam kenê û sozê serkwtişî danê.''