Hemserekîya Konseya Rayberdişî ya KCKyî bi wesîleya 4ê Nîsane rojbîyayîşê Rayberê Şarê Kurdî Abdullah Ocalanî eşkerayîyêke daye.

Eşkerayîye wina ya:

''Ma kewtê serra 75. ya rojbîyayîşê Rayberîye ke nê dewrî de seba şarê kurdî roja tewr manadar a. Ma na roja girînge şarê Kurdîstanî, cinîyan, ciwanan, şaran û dinya rê fîraz kenê. Ma Rayber Apoyî selam kenê ke şarê kurdî çinbîyayîşî ra xelisnayo. Na roje seba şarê kurdî yena manaya newera estbîyayîşî coka zaf girîng a û her ca de bi çalakîyanê xurtan yena fîrazkerdene. Şarê Kurdîstanî û şarê ma yê teberê welatî ganî 4ê Nîsane nê esasî ser o fîraz bikerê.

4ê Nîsane seba şarê kurdî wayîra manayêka pîl a. Wextêk de ke şarê Kurdîstanî verê çinbîyayîşî de bi Rayber Apo werişt we û seba ke şarê Kurdîstanî newera gandar bibo têkoşînêk da destpêkerdene. Rayber Apoyî cu û estbîyayîşê xo da averşîyayîşê nê têkoşînî, seba servistişê nê têkoşînî feda kerd. Rayber Apoyî bi felsefeya xxo ya azadîye zî raştîya kesayet û komelêkê neweyî afernaye ke Kurdîstan de cuya azade awan bikero. Nê taybetmendîyanê tarîxîyan ra estbîyayîşê Rayber Apoyî seba şarê Kurdîstanî mîladêko newe yo.

Afernayoxanê sîstemê kolonyalîzmî û qirkeran seba ke verê prosesê têkoşînê Rayber Apoyî û azadîya Kurdîstanî bigêrê Komployo Mîyanneteweyî kerd û Rayber Apo vist mîyanê sîstemê îşkence û tecrîdî yê Îmraliyî. La Rayber Apoyî nê 24 serranê tecrîdî de qesasê xo girewt û rixmê şertanê tepişîyayîşî zî seba azadîya şaran, cinîyan û bindestan manîfestoyê dewrî aferna. Rayberê ma bi nê karakterê xo hem şarê ma hem zî ma kerdî wayîrê rûmetêkê pîlî. Merdimatîye, şarê ma zî deyndarê ey ê. Coka famkerdiş, hîskerdiş û têkoşînê seba azadîya Rayber Apoyî wezîfe û mesuldarîya ma ya sereke ya.

Polîtîkaya ke Îmrali de vera Rayber Apoyî yena caardene polîtîkayêka qirkerdişî ya. Komployo Mîyanneteweyî, esîrkerdiş û tecrîd teyna vera Rayberê ma nênê caardene. Nê polîtîkayan ra merdim fam keno ke kurdî çita de têrî yê. Na polîtîka teber de vera têgêrayîş û şarê ma zî yena caardene. Ganî ma têkilîya mabênê esîrkerdişê Rayberîye, tecrîd û qirkerdişê kurdan hol fam bikerê û vera ney tewirê xo bimojnê, têkoşîn bikerê. Ganî ma bizanê ke têkoşînê seba azadîya Rayber Apoyî, têkoşînê vera qirkerdişê kurdan o û bi nê ferasetî hînî bi xurtî ma wayîrê Rayber Apoyî vejîyê. Girîng o ke 4ê Nîsane bi nê feraset û tewirî bêro fîrazkerdene.

AKP-MHP yo ke dişmenê kurdan o, tecrîdê vera Rayber Apoyî keno giranêr ke no zî têkilîya mabênê qirkerdişê kurdan û tecrîdî mojneno ra. Ganî ma na raştîye hol fam bikerê, bizanê ke têkoşînê vera tecrîdî têkoşînê vera qirkerdişê kurdan o, no têkoşîn zî bi rijnayîşê îqtîdarê AKP-MHPyî beno. Nê esasî ser o ganî ma têkoşînê vera faşîzmê AKP-MHPyî pîlêr bikerê.

Rayber Apoyî paradîgmaya komelê demokratîk, ekolojîk û azadîgîrê cinîyan awan kerd ke tesîrê pêro merdimatîye kena. Rayber Apoyî na paradîgma bingeyê azadîya cinîyan de naye ro, azadîya cinîyan kerde destpêkê pêro azadîyan. Rayber Apoyî bi afernayîşê na paradîgma nêweşîya modernîteya kapîtalîste rê çareyêke peyda kerde. Rayber Apoyî vera modernîteya kapîtalîste û ferasetê ci yê demokrasî xeta modernîteya demokratîke afernaye.

Rayîro tewr girîng ê famkerdiş û fîrazkerdişê 4ê Nîsane no yo ke paradîgma, îdeolojî, azadî, demokrasî û ferasetê cuya newîye yê Rayber Apoyî bi xorinî bêrê famkerdene û vilakerdene. No mesuldarîya pêro kurdan a. Ganî pêro kurdî cu, tewir û fikranê Rayber Apoyî hol fam bikerê. Ganî pêro kurdî paradîgmaya Rayber Apoyî biresnê pêro merdimatîye. Ganî ma nê karî bi xurtî bikerê, vera Komployê Mîyanneteweyî asta mîyanneteweyîye de hesasîyet û têkoşînêk biafernê.

Rayber Apo bi fikr, tewir, têkoşîn û cuya xo bîyo ewladê merdimatîye yo tewr ercîyaye. Coka ma Rayber Apoyî û rojbîyayîşê ci reyna bi hurmetî selam kenê, heskerdiş û hesreta xo mojnenê ci. Ma nê rojbîyayîşê manadarî şarê Kurdîstanî rê, gerîlayanê fedayîyan rê, cinîyan û ciwanan rê û pêro dinya rê fîraz kenê. Şarê ma û dostê ma ganî her ca de bi beşdarîyêka xurte 4ê Nîsane fîraz bikerê û her ca de daran ronê.''