Hemserekîya Konseya Rayberdişî ya KCKyî derheqê sîstemê tecrîdî, teda û îşkenceyî yê Zîndanê Îmraliyî de eşkerayîyêke daye.

Eşkerayîye wina ya:

''23 serrî yo Rayber Apo binê tecrîdêkê giranî de yo. Temmuza 2011î ra nata 10 serrî yo nêeşkeno avûkatanê xo bivîno. Têna wextê weçînayîşanê herêmîyan de semedo ke rayê kurdan bêrê girewtene destûr dîya ke avûkatî çend reyî pêvînayîşî bikerê. 5ê nîsana 2015î ra nata zî semedê nêrazîbîyayîşê rayaumûmîye destûr dîya ke keyeyî çend reyî pêvînayîşî bikerê. Bi serran  o cezaya dîsîplînî sey bahane yena mojnayene û bi nê hawayî pêvînayîş yeno astengkerdene. Nê kerdişî îsbat kenê ke sîstemê Îmraliyî goreyê huqûqî ney la goreyê sîyasetî ameyo awankerdene. Sîstemê Îmraliyî bi hîsanê qesasî ameyo awankerdene. Nîşaneyanê na raştîye ra yew zî no yo ke bi bahaneya 'wolta de qisey kerdo' cezaya dîsîplînî dîyaye Rayberîye û bi nê hawayî pêvînayîşê keye û avûkatan ame astengkerdene.

Nêzdîbîyayîşê Îmraliyî yê vera Rayberîye mojneno ke raştîya îqtîdarê faşîstî ya dişmenîya vera kurdan eşkera keno. Caardişê faşîstî Tirkîya de Îmrali ra dest pêkenê û pêro Tirkîya de ca benê. No tesbît roje bi roje xo zêdêr îsbat beno. Hemserekê Pêroyî yê Komeleya Heqanê Merdiman (ÎHD) Ozturk Turkdoganî pê eşkerayîyêke na raştîye viste verê çiman. Ey pare kerd ke teda û zorbazîya vera tepişteyanê kurdan heman ferasetî ra ya. Na raştîye hetê HDPyî ra tim yena parekerdene.  Kerdişê Îmraliyî pêro zîndanan ra vila bîyê û vurîyayê polîtîkayêk a ke vera şarê Tirkîya yena caardene. Ganî na raştîye hînî hetê hêzanê sîyasîyan ê muxalîfan ra bêra îfadekerdene. Nêbo mumkîn nîyo ke vera îqtîdarê AKP-MHPyî muxalefetêko raştikên bêro kerdene. Eke Tirkîya de demokrasî û heqê merdiman do bêrê caardene ganî nêzdîbîyayîşê vera kurdan û Rayber Apoyî bêrê vurnayene. Heta ke meseleya kurdan nêra çareserkerdene Tirkîya de demokrasî nêna caardene, no tesbît xora Îmrali de geş bîyo. Heta ke nêzdîbîyayîşê vera Îmraliyî nêro vurnayene, babeta meseleya kurdan de Tirkîya de gamêke nêra eştene û Tirkîya do biba mehkuma îqtîdaranê faşîstan.

Girawe û zîndanê şexsêkî de ke wextê wolta de qiseykerdiş sey sûcî hesibîyeno, mendişê 23 serran mojneno ke tedayêka senîne yena kerdene. Pê bahaneyanê winasênan tim pêvînayîşî yenê astengkerdene. No zulm o, sûcê vera merdimîye yo. Hişmendîya faşîste bi nê hawayî wazena ke her roje Rayber Apoyî rê îşkence bikera. Sebebê ney zî no yo ke Rayber Apo kurdan zanaye keno, vera sîstemê înkar û qirkerdişî wurzneno payan ser. Ma zî Rayber Apoyî ra zanenê ke bi kamyew hişmendî û armancî na polîtîka zîndanê Îmraliyî û zîndananê bînan de yena caardene. Xora şarê ma zî, Rayber Apo zî, tepişteyî zî vera nê kerdiş, polîtîka û hişmendîye xover danê. Heta ke na hişmendîye, polîtîka û kerdişî estbê demokrasî û azadîye do nêrê Tirkîya. Pê armancê qirkerdişê şarê kurdî nê çîyî yenê kerdene. Coka êyê ke Tirkîya de semedê demokrasî û azadîye têkoşîn kenê, ganî vera tedaya Îmraliyî û zîndanan vengê xo berz bikerê.

Mesuldarîya avûkatan verê Rayber Apoyî de estê. Şarê kurdî zî paweno ke avûkatê ci mesuldarîyanê xo bîyarê ca. Şarê kurdî avûkatan ra wazeno ke derheqê cuye û weşîya Rayberîye de agahîyê bidê înan. Labelê avûkatî semedo ke nêeşkenê şorê pêvînayîşî, rewşa Rayber Apoyî ra agahdar nîyê. Coka nêeşkenê mesuldarîya xo bîyarê ca.

Keyeyî zî nêeşkenê bi biranê xo, ewladanê xo reyde pêvînayîşî bikerê. Têna ê Rayber Apoyî nê keye û avûkatê 3 tepişteyan ê bînan ê Îmraliyî zî nêeşkenê pêvînayîşî bikerê. Keyeyî rewşa weşîye ya bira û ewladanê xo yê Îmraliyî nêzanenê. Sûcê vera merdimîye yo ke destûr nêdîyeno pêvînayîşê keyeyan. Heqê keyeyan o ke şorê Îmraliyî û rewşa bira û ewladanê xo bizanê. Pê nê qedexeyî têna tepişteyan rê ney keyeyan rê zî îşkence yeno kerdene.

Bêguman dewletê ke mîyanê Komployê Mîyanneteweyî de ca girewt û dezgehê ke Tirkîya endama înan  ê na rewşe ra mesuldar ê. Konseya Ewropa û CPT rixmo ke dewleta tirke Îmrali de goreyê krîteran tênêgêrena û sîstemêkê îşkenceyî awan kerdo, bi hawayêkê eşkerayî tewirê xo nêmojnenê. Wayîrê heqaê merdiman nêvejîyenê. Rixmo ke krîterê huqûqî û heqê merdiman nêbenê babeta bazarîye semedê menfaatanê xo yê sîyasîyan sûcê dewleta tirke nêvînenê. Dewleta tirke zî nê tewirî ra îstîfade kena û sîstemê teda û zulmî yê Îmraliyî û zîndanan rê dewam kena. Konseya Ewropa û CPT mesuldarê na rewşe yê.

Sîstemê teda û zorbazîye yê Îmraliyî nika zîndanan de pê rayîr û metodanê cîyayan dewam keno. Armancê teda û zulmê Îmraliyî çita yo armancê teda û zulmê vera tepişteyanê kurdan  zî o yo. Zulm û îşkenceyo nikayên Cuntaya 12ê Êlule ra zêdêr ê. Semedo ke kolonyalîzmo qirker pê rayîr û metodanê neweyan teda û zulmê zîndanan û şarê kurdî giranêr keno. Faşîzmê AKP-MHPyî 6 serrî yo polîtîkaya teda û zulmê faşîstî mîyanê şert û mercananê zîndanî de ano ca. No zulmê zîndanan rîyê raştikênî yê AKP-MHPyî eşkera keno. Îqtîdaro faşîst teber de se keno zîndanan de zî heman zulm û teda keno. Ewro şarê Tirkîya, hêzê demokrasî û muxalîfê sîsyasî vera xeylêk polîtîkayanê AKPyî wurzenê we. Heman hişyarîye û mesuldarîye ganî vera tedayanê serê Îmraliyî û zîndanan bêrê mojnayene.

Konseya Ewropa û CPT yê ke babeta Îmraliyî de û zîndanan de wayîrê mesuldarîyan ê, dezgehê heqanê merdiman ê Tirkîya û komîsyonê zîndanan ê Meclîsî ganî şorê Îmraliyî û pêro zîndanan de cigêrayîşan bikerê, çimdarîyanê xo rayaumûmîye reyde eşkera bikerê. Îmrali ra qet agahîye nêna girewtene û na rewşe derheqê cu û weşîya Rayber Apoyî de şar, keyeyan û her kesî qerqilnena.

Tepişteyê Îmraliyî û tepişteyê pêro zîndanan rûmetê şarê kurdî yê. Tedaya Îmraliyî û zîndanan bi esasî tedaya vera kurdan o. Vera teda, tecrîd û sîstemê îşkenceyî yê Îmraliyî şarê kurdî zî  têkoşînêkê bêmabênî keno. No têkoşîn ganî bêro pîlkerdene, tecrîdê Îmraliyî û tedaya zîndanan bêro şiknayene û babeta cuye û weşîye ya Rayberîye ser o agahîye bêra girewtene. Vera tecrîdê Îmraliyî û tedaya zîndanan sere de şarê kurdî û dostê înan kesê wayîrwijdanî û kesê ke xo sey merdimî pênase kenê ganî zêdêr têbigêrê.''