Mêrdîn de roja îneyî Veysî Taşî semedê protestokerdişê tecrîdê serê Rayberê Şarê Kurdî Abdullah Ocalanî xo vêşna. Hemserekîya Konseya Rayberdişî ya KCKyî derheqê şehadetê Taşî de eşkerayîye daye û nê vatî:

"Ma çapenîye ra eşnawit ke embaz Veysî Taşî semedê protestokerdişê tecrîdê serê  Rayber Apoyî xo vêşnayo û şehîd bîyo. Embaz Veysî Taş vera tecrîdê serê Rayber Apoyî çalakîyêka sîyasîye kerda û şehîd bîyo. Ma şexsê embaz Veysî Taşî de heme şehîdanê şoriş û demokrasîyî reyna bi hurmet û minetî yad kenê û sozê serkewtişî yo ke ma dayo şehîdan, newe kenê.

Mesajê embaz Veysî Taşî ra yeno famkerdene ey emrê xo dayo têkoşînê azadîye yê Kurdîstanî û welatperwerêko ercîyaye yê Kurdîstanî yo. Wextê derbeya leşkerî ya faşîste ya 12ê Êlule de Zîndanê Amedî de mendo, îşkenceyê giranî dîyî. Dima zî zîndanan de mendo. Coka rîyê dewleta tirke yo qirker û dişmenê kurdan hole dîyo û vera dişmenî tim têkoşîn kerdo. Yeno vînayene ke senî kesêko zaneye û welatperwer o. Bi şehadetê xo o hinda tewrê kerwanê şehîdan bîyo û şehîdêkê Kurdîstanî yo.

Embaz Veysî Taşî bi çalakîya xo mojna ke senî pabesteyê Rayber Apoyî yo û Rayber Apo semedê şarê kurdî senî ercîyaye yo.  Çalakîya ke ey kerda mojena ke o senî pê eşq û heskerdişê xorî pabesteyê Rayber Apo û têkoşînê azadîye yê Kurdîstanî yo. Pabestîya ci ya Rayber Apo û Kurdîstanî zaf girde û bimana ya.  Çalakîya ci nimûneya cesaretî pabestîye ya. Mesajo ke ma rê verdayo zî zaf muhîm o. Qalecikerdişê Mûsa Anterî, yadkerdişê Ferhat Kurtayî zaf bimana yo. Vengdayîşê ci yê şarê kurdî ganî bêro goştarîkerdene û caardene. Şarê Kurdîstanî yo welatperwer ganî waştişanê embaz Veysî Taşî bîyaro ca. Ma sey têgêrayîşê azadîye yê Kurdîstanî vengdayîş û waştişanê embaz Veysî Taşî sey talîmatî vînenê û wina nizdîyê ci benê.

Embaz Veysî Taşî çalakîyêka girde kerda û semedê wayîrvejîyayîşê Rayber Apoyî veng dayo şarê ma, dostanê ci û hêzanê demokrasîyî ke wa têkoşîn bêro xurtkerdene.  Reyna waşto ke sey têgrayîşî zî ganî vera dişmenî têkoşîn bêro xurtkerdene.  Nê hetî ra  ganî çalakîya hemra Veysî Taşî raşt bêro famkerdene û cewabo raşt bidîyo ci. Bingeyê mesajê embaz Veysî Taşî oyo ke wa bi xurkerdişê têkoşînî  sîstemê tecrîdî yê vera Rayber Apoyî bêro şiktene. Ma zî veng danê şarê xo û dostanê xo ke wa waştişê şehîdan bîyarî ca û vera tecrîdî tewirê xo dahîna xurt û zelal ramojnê û têkoşînî xurtêr bikerê.''