Hemserekîya Konseya Rayberdişî ya KCK’yî ya ke 5 şorişgêr û gerîlayê ke hêrişê hewayî yê roja Newroze yê serê Qendîlî de şehîd bîbî bi vîr ardî, vat, “Hêrişê 21’ê Adare yo ke Komîteya ma ya Karanê Teberî hedef girewta, ê de gişta ajanan ê xorotoxan esta. MÎT’î, bi destê tayê hêzan tayê kesê zihîfî kerdê ajan û bi hayîdarîyanê ke înan ra gêno hêrişanê hewayîyan virazeno. Nê hêrişî de zî sey hêrişê hemverê hemra Şehîd Helmetî (Dîyar Xerîb) gişta hemkaran esta.”

Hemserekîya Konseya Rayberdişî ya KCK’yî 5 şorişgêr û gerîlayê ke roja 21’ê Adar a Newroze de hêrişê serê Qendîlî de şehîd bîbî bi vîr ardî û eşkerayîya xo de ca da nê îfadeyan:

 “Hêrişê hewayî yê teyareyanê şerî yê Tirkî yê roja 21’ê Adar a Newroze yê serê wareyê Qendîlî de hemrayê ma fermandaranê ewilênan ê gerîlayan ra Sînanê Sor (Alî Aktaş), kadroyanê ma yê karanê teberî ra Serhat Varto û Navdar Sînegir, Serhat Şafak û şerwanê ma yo ciwan Şîyar Faraşîn şehîd bîyî. Ma pêroyê şarê xo rê û keyeyanê înan rê serweşîye wazenê; ma soz danê ke ma do hesreta înan a Kurdistanê Azadî qetîyen bica bîyarê.

 Hêrişê 21’ê Adar a Newroze yo ke Komîteya ma ya Karanê Teberî hedef girewte de zî gişta ajanan ê xorotoxan esta. . MÎT, bi destê tayê hêzan tayê kesanê zihîfan keno ajan û bi hayîdarîyanê ke înan ra gêno hêrişanê hewayîyan virazeno. Nê hêrişî de zî sey hêrişê hemverê hemra Şehîd Helmetî (Dîyar Xerîb) gişta hemkaran esta. Nê hêrişê ke xusûsen hemverê embazanê ma yê ke Başûrê Kurdistanî de yenê naskerdene yenê kerdene ramojnenê ke MÎT Başûrê Kurdistanî de xeylî organîze bîyo. Eke hetkarîya tayê hêzan çinbo mumkun nêyo ke MÎT Behdînan ra heta wareyanê Soranî hende organîze bibo. Organizebîyayîşê MÎT’î hetê hukmat û partîyanê sîyasîyan ê Başûrê Kurdistanî ra yenê zanayene, ê çimê xo gênê û bi nê hawayî MÎT her wareyî de organîze beno.

 Na nuqta de gureyêko tarîxî keweno milê partîyanê sîyasîyan, roşinvîr, hunermend û heme welatperweranê Kurdan ser. Ganî hendî hemverê kesanê ke dişmenî dir hemkarîye kenê û zirar danê mucadeleyê azadîye, çi partî, hêzo sîyasî, kes yan zî kesî benê wa bibê tewir bêro girewtene. Ganî hendî tu hêzo sîyasî, kes yan zî kesî çîyanê winayênan rê cesaret nêkerê.

 Ganî hemeyê şarê Kurdî bizano ke Têgêrayîşê Ma yê Azadîye heman wextî de têgêrayîşê sûcdaran ra hesab persayîşî û têgêrayîşê binerdkerdişê îxanet û hemkarîye yo. Çunke heta hemkarî û îxanet raste ra nêro wedartene mumkun nêyo ke biresîyo cuya demokratîke û a cuye bêro mendekerdene. Nê bingeyî de do qetîyen qesasê hemrayan Şehîd Helmet, Şehîd Sênanê Sor, Şehîd Serhat Varto, Şehîd Navdar Sînegir, Şehîd Serhat Şafak, Şehîd Şîyar Faraşîn, Şehîd Şahîn Dîcle û Şehîd Devranî bêro girewtene.”