Deweka Zevye ya merkezê Sêrtî de goristanê bêkesan de 14 gorî estê. Goreyê zanayîşan nê gorî aîdê gerîlayanê ke 20-28ê êlule de herêma Herekolî û qezaya Baykanî de şer de şehîd bîyî. Serê goran de tarîxê şehadetî û hûmara rêze estê. 

Selahîyetdarê leşkerîyî keyeyan rê telefon kenê û vanê 'wa bêrê cenazaya xo bigêrê'. La heta nika cenazayêke nêameye teslîmkerdene.

Temsîlkara MEBYA-DERî ya Sêrtî Leyla Ozalp derheqê babete de qisey kerd. Leyla Ozalp da zanayene ke 28ê êlule de şerê Herekolî de 5 gerîlayê HPGyî şehîd bîyî û naye ra dima tay keyeyan xo resna înan. Ozalpe ard ziwan ke seba 5 cenazayan veng dîyayo 15 keyeyan la qet yew cenaza zî nêameye teslîmkerdene. 

Ozalpe pare kerd ke 20ê êlule de şerê Baykanî ra dima 3 gerîlayî şehîd bîyî û veng dîya tay keyeyan ke seba teşhîsê cenazayan şorê qereqol. 

Ozalpe vat: ''La keyeyan rê testê DNA nêame kerdene. Cenazayî goristanê bêkesan de ameyî definkerdene. Armanc keyeyan rê îşkence yo. Keyeyan rê cenazayê parçekerdeyî yenê mojnayene. Leşkerî tay keyeyan rê vanê 'bêrê no cenazaya şima ya.' La wexto ke keyeyî şinê leşkerî vanê cenaza yê înan nîya û seke pê keyeyan yarî kenê. Psîkolojîyê tay keyeyan xeripîyenê. Keyeyan vat cenazayê 3 şehîdan heman poşet de ameyî definkerdene. Heta nika 20 cenazayanê goristanî ra 6ê ci ameyî teşhîskerdene. Leşkeran venga 60 keyeyan da ke wa bêrê cenazayanê xo bigêrê. La cenaza nêdîyena înan û leşkerî înan rê derheqê domananê ci de persan persenê.''

Ozalpe rewşe sey 'wehşet' pênase kerd û venga rayaumûmîye da ke derheqê babate de hîsger biba.