Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra kişîyayî lajê xo Ferît Şenyaşarî reyde 266 rojî yo verê Edlîyeya Riha de nobeta edaletî gêna.

Ferît Şenyaşarî îfade kerd ke ê binê zulmî de çalakîya xo kenê û vat: ''Nobeta ma menga 9. de ya. Di waştişê ma estê. La hema ma muxatabêk nêdî. Tay hêzê tarîyî yê ke mîyanê îqtîdarî de yê tesîrê dezgehanê muhakemekerdişî yê Riha kenê. Qanûnî nênê caardene. Riha de  huqûq û qanûn nênê caardene. Ma heta peynî nobeta xo ya edaletî rê dewam bikerê.''

Keyeyê Şenyaşarî hesabê xo yê medyaya dîjîtale ser o zî no mesaj da: ''Riha de mîyanê AKPyî de awanîyêka tarîye esta. Na awanîya ke binê kontrolê wekîlî de ya, Riha de tesîrê dewlete kêm kerdo û qanûnan nêana ca. Nobeta ma ya edaletî roja 26. de dewam kena.''