Koordînasyonê KJKyî bi wesîleya serrgêra 38. ya Hemleya 15ê Tebaxe eşkerayîyêke daye. Eşkerayîye wina ya:

''Serrgêra 38. ya Hemleya 15ê Tebaxe de ma sere de şexsê Fermandarê Pîlî embaz Egîdî de, şexsê Sara, Azîme, Bêrîtane, Esmere, Têkoşîne, Jîyane û Berfînan de ma pêro şehîdanê azadîye bi rêz û hûrmetî yad kenê û perwerîya xo ya bi înan dibare kenê.

Seba çinkerdişê sîstemê îşxalker û kolonyalîstî hêzanê ma yê pawitişî serra 1984î de na hemle dabî destpêkerdene û na hemle nika pêro parçeyanê Kurdîstanî de bêmabên dewam kena. Ma pêro hêzanê xo yê pawitişî selam kenê. Şexsê hêzanê ma yê HPG û YJA-Starî de ke vera artêşa tirke ya faşîste û pêro hêzanê dişmenan Herêmanê Pawitişî yê Medya de bi ruhê Apogîrî alaya xoverdayîşî berz kenê, roşanê înan ê gandarbîyayîşî fîraz kenê.

Bêguman guleyo ke 38 serrî verî Dih û Şemzînan de amebi teqnayene, têna qereqolê dewleta tirke ya faşîste hedef nêkerd. No gule cewabêk bi ke kurdanê azadan vera înkar, îmha, kolonyalîzm û qirkerdişî dabi.

Na hemle warê îdeolojîk, polîtîk, felsefî û rêxistinîye de hemleyêka newîye ya, xeta şerî û cuye ya. Hemleya 15ê Tebaxe vera koletî, bênasnametîye, kanwazîye, seksîzm, zulm, hemkarîya dişmenî, cuya bêmana û cîyakere serewedaritişêk bi. Guleyo verêno ke vera dinyaya serdestîya camêrdan, fikr û sîstemê na cuye ame teqnayene û seba cinîyan ê kurdan bi hêvî, rayîr û roşnîya azadîye. Coka 15ê Tebaxe hem seba kurdanê azadan û hem zî seba cinîyan ê azadan roja gandarbîyayîşî ya. Cinîya ke bi Hemleya 15ê Tebaxe dest eşt çeke heman wextî de îdeolojî, vîr, rêxistin û aktîfbîyayîş zî vistî destî. Nê esasî ser o 15ê Tebaxe bi hemleya destvistişê nasnameyî yê cinîyan ê kurdan. Bi ruhê gandarbîyayîşî îmha, înkar, asîmîlasyonîst, polîtîkayanê vera cinîyan û şarê kurdî rê ame vatene hînî bes o û 15ê Tebaxe bi nameyê gandarbîyayîş û xobîyayîşî û çimeyo verên ê paradîgmaya ma ya demokratîke, ekolojîke û azadîya cinîyan o zî. Ewro têgêrayîşê cinîyan ê kurdan bi xoverdayîşê Hemleya 15ê Tebaxe xoverdayîşê xo xurtêr kerdo.

Şarê kurdî yoo ke qirkerdişan pêro heqê ci ameybî xespkerdene, estbîyayîşê ci çin hesibîyabi, bi xoverdayîşê 15ê Tebaxe estbîyayîşê xo newe ra aferna. Raştîya 15ê Tebaxe Kurdîstan de bîye bingeyê cuya azade. Nê xoverdayîşî nasnameyê kurdanê azadan akerd û parçebîyayîşê neteweyî zî werte ra wedarna û rayîrê yewîya neteweyîye akerd. Dewleta tirke ya faşîste ewro Rojawan, Başûrê Kurdîstanî, Şingal û Vakurê Kurdîstanî de hêrişê xo yê qirkerdiş û îşxalî zêdînayî û nê hêrişan reyde wazena têgêrayîşê ma îmha bikera û pêro destkewteyanê kurdan çin bikera. Dewleta tirke ya faşîste dişmenîya kurdan, cinîyan û şaran kena. Dewleta tirke wazena ke îşxalî çar parçeyan de xorin bikera. Ganî no planê îşxalî bêro pûçkerdene. Seba ke no konsepto newe bêro pûçkerdene ganî şarê ma wayîrê erdê xo û îmkananê cuya azade vehîyo, seba mendekerdişê cuya azade bêguman yewîya neteweyîye ferz bikero. Ewro dewleta tirke ya faşîste hêrişê Herêmanê Pawitişî yê Medya kena û vera nê hêrişan gerîlayê ma xoverdayîşêkê pîlî kenê. Cewabo tewr xurt ê seba paştdayîşê nê xoverdayîşî no yo ke Kurdîstan de têkoşînê vera îşxalî bêro berzkerdene.

Hêzê kolonyalîstî seba tasfîyekerdişê têkoşînê ma yê azadîye û çinkerdişê sîstemê ma yê alternatîfî, bi hawayêkê topyekûnî hêrişan kenê. Polîtîkayê tecrîdî yê vera Rayber Apoyî zî tersê nê sîstemê azadîwazî ra yenê kerdene. Nê hêrişê ke nîşaneya tersê pîlî yê vera kurdanê azadan a, pîlîya xoverdayîşê têgêrayîşê ma eşkera kenê. Nê wextî de ke Rojhelatê Mîyanênî se serebûtê pîlî qewimîyanê, krîzê sîyasî, komelkî, ekonomîk û leşkerî asta tewr berzî de yê, yeno waştene ke herême newe ra bêra dîzaynkerdene. Na hela tarîxîye de her wextî ra zafêr îmkanî est ê ke destkewteyê pîlî bêrê destvistene. Sey têgêrayîşê azadîye û hêzê ci yo serkêş têgêrayîşê cinîyan ê kurdan ma vanê ke wayîrê nînan eşkenê herikîyayîşê tarîxî bivurnê. Bi na hişmendîye ma Hemleya 15ê Tebaxe pêşwazî kenê. Vera xîretanê îşxalî û mezgê îşxalî wedaritişê astengîyanê verê yewîya neteweyîye, pîlkerdiş û radîkalkerdişê têkoşînî tek rayîrê azadîye yo.

Sîstemê îşkenceyî yê Îmraliyî, raştîya şerê vera gerîlayan, tedayê vera şarê ma, polîtîkayê qirkerdişî yê vera cinîyan kenê şert ke her ca de ruhê 15ê Tebaxe bêro geşkerdene. Rayîrê çinkerdiş û şiknayîşê nê hêrişan, rayîrê servistişê têkoşînê azadîye no yo ke goreyê ruh û îradeyê Hemleya 15ê Tebaxe metodêkê têkoşînî bêro afernayene.

Nê wextî de ke ma Hemleya 15ê Tebaxe fîraz kenê, ma Roşanê Gandarbîyayîşî yê şarê kurdî, şaranê herême fîraz kenê. Şexsê Fermandarê Serkêşî embaz Egîdî de ma pêro şehîdanê xo yê azadîye bi minet û rêzdarî yad kenê. Ma Roşanê Xoverdayîşî yê gerîlayanê azadîye fîraz kenê ke vera artêşa faşîste bi ruh û îradeyê Apogîrî her cephe de bi xurtî xo ver danê. Ma bawerî û qerardarîya xo ya seba têkoşînî newe kenê ke no xoverdayîş do faşîzmî, kolonyalîzm, koletîye û seksîzmî qetî ser bivisno.''