Komîteyanê Zîndanan ê PKK û PAJKî derheqê serebûtanê mergî yê zîndanan de eşkerayîye daye. Eşkerayîye wina ya:

''Îqtîdarê AKP-MHPyî her ca de bi hawayêkê bêperwayî hêrişê şarê ma û erjanê ma yê têkoşînî keno. Seba ke binkewtişê xo yê Herêmanê Pawitişî yê Medya binimno Rayberê ma tecrîd keno, vera gerîlayan sere de şuxilîyayîşê çeka kîmyewîye xeylêk sûcan keno, Şingal de hêrişê rayberanê Îdareyê Xoserî keno, Rojawan de hêrişê merdiman ê welatperweran keno, zîndanan de tepişteyanê şorişgêran ê welatperweran qetil keno. Labelê nê hêrişî do nêeşkê verê rijîyayîşê faşîzmî bigêrê, eqsê ci kîn û hêrsê ma zêdînenê û esasê mesuldarîya verê şehîdan benê wesîle ke têkoşînê ma bibo pîlêr.

Nê cayan ra yew zî ke tede hêrişê faşîstî yenê kerdene zîndanî yê. Bi des hezaran merdimê ma yê welatperwerî û şorişgêrê ke seba qirkerdişê kurdan zîndanan de tepişîyenê, seba ke bêrê teslîmgirewtene, îradeyê înan bişikîyo û têkoşînî ra dûrî bêrê vistene, maruzê polîtîkayanê teda û îşkenceyî manenê. Îqtîdarî zîndanî vurnayî merkezê qesasî û îşkenceyî. Her roje agahîyê şehadetî yenê, tepişteyî yew bi yew yenê qetilkerdene. Hewteyê peyênî de embaza ma Garîbe Gezer, 15ê kanûne de embazê ma Halîl Guneş û Abdulrezak Şuyur ameyî qetilkerdene.

 Teda û îşkenceyê vera Garîbe verî çapemenîye de weşanîyabî. Karakterê îqtîdarê AKP-MHPyî yê dişmenîya vera kurdan û polîtîkaya qirkerdişî ya vera zîndanan,  bêhîsgerîya ma ya teberî reyde bîyî yew û embaza ma Garîbe verê çiman de qetil kerde. Nêbîyayîşê qeydê dîmenî yê hela şehadetî zî her çi eşkera keno. Eke Garîbe xo bikiştêne dîmenî cade çapemenîye de biameyêne vilakerdene, babete biameyêne vurnayene. Bi hawayêkê eşkerayî, qestî ra, bi waştiş û plankerdeyî a kişîyaye.

Bi heman hawayî Halîl Guneş embazê ma bi ke prosesê xoverdayîşê zîndanan de nêzdîyê 30 serran wayîrê meseleyanê giranan ê weşîye bi. Tewirê embaz Halîlî zîndan de tam tewiro fedayî bi. Embaz Halîl vera nêweşîya kanserî û vera teda û îşkenceyê AKP-MHPyî goreyê ruh û tradîsyonê xoverdayîşî yê 14ê Temmuze têgêra û zerrîya ci de no xoverdayîş cayêko pîl bi. Embaz Abdulrezak Şuyur vera pêro polîtîkayanê teslîmîye û hêrişanê faşîzanan bi qerardarî xo ver da, bi wayîrê tewirê rûmetênî.

Her hîrê embazê ma zî qestî ra û bingeyê polîtîkaya qirkerdişê kurdan de ameyî qetilkerdene. Nê embazê ma  her hetî ra ewladê rindî yê şarê ma, milîtanê pîlî yê têkoşînê ma yê. Ewro hema zî seba kiştişê bi hezaran tepişteyanê nêweşan îşkence zî tede bi her hawayî kerdişê xirabî yenê kerdene. Labelê ganî bizanîyo ke tewr û qerardarîya nê embazanê ma seba ma moral o, hêzî dano ma. Ma do îqtîdarê faşîstî ra hesabê kişîyayîşê nê embazanê xo bipersê.

Bi na wesîle ma keyeyanê ercîyayeyan ê embazanê xo yê şehîdan rê , emnazanê xo yê zîndanan rê, şarê ma yê welatperwerî rê serweşîye wazenê. Bingeyê şehadetê embazanê xo de ma soz danê ke dormeyê azadîya Rayberîye û şarê ma de bêrê pêser û têkoşînê xo xeta serkewtişî de bîyarê ca. Ma venga şarê xo yê welatperwerî danê ke wayîrê cenazayanê embazanê ma yê şehîdan vejîyo, bi hawayêkê girseyî tewrê merasîmê cenazayan bibo, bi girseyan tewrê serweşîye bibo û bedelê ci çita beno wa bibo vera nê qirkerdişan vejîyo meydanan. Ma venga hêz û dormeyanê demokratan û roşnvîran, pawitoxanê heqanê merdiman, dezgehanê çepgîran û sosyalîstan, merdimanê wayîrwijdanan danê ke vengê xo berz bikerê, bikerê vengê xooverdayoxanê zîndanan, bibê nefesê xoverdayoxa. Ma bi bawerîya ke no nêzdîbîyayîş bêro caardene selam û hûrmetê xo pêşkêş kenê.''