Rêxistina HDPyî ya Amedî kongreya xo ya hîrêyîne pê şîarê 'Pê hêzê xo yê rêxistinî ma tecrîdî bişiknê, cuya azade ya demokratîke awan bikerê' qezaya Peyasî de kerde.

Hemsereka HDPyî Pervîne Buldan , Hemserekê Kongreya Komelê Demokratîkî (KCD) Bedran Ozturk, aktîvîstê TJA, Hemserekê DBPyî Salîha Aydenîz û Keskîn Bayindir zî tede xeylêk temsîlkarê partî û rêxistinan tewrê kongre bîyî.

Pervîne Buldan kongre de qisey kerd û vat: ''Amedî îşkence, dardekerdiş dîyî la qetî nasnameyê xo war nêverda. HDP zî vera teda û astengîyan hêzê xo Amedî ra gêno. Şarê kurdî bi serran o pê keda xo nê têkoşînî keno. Ma ruh da nê erdî. Hêzê çewî nêeşkeno ke ma nê erdî ra vejo. Ma pê deklarasyonê xo rayîrê xelisîyayîşî pêşkêş kerd. Ma do îtîfaqê demokrasî Amedî ra geta Tekîrdagî, Dengizê Reşî ra heta Dengizê Sipî pîl bikerê. ''

Buldane bale ante teda û zorbazîyanê sey 'Dewaya Kobanê' û vat: ''Ê zî zanenê ke do pê ma nêeşkê. Ê do qetî pê ma nêeşkê, nêeşkê verê ma bigêrê. Şarê ma do bi sereberzî tim vera înan wurzo we.''

Buldane ra dima Hemserekê HDPyî yê Amedî Zeyyat Ceylan, Hetkarê Hemserekanê ESPyî Beycan Taşkiran, Serekê Partîya Komunîste ya Kurdîstanî Sînan Çîftyurek û Hemserekê KCDyî Berdan Ozturkî qisey kerd.

Badê qiseykerdişan raporî ameyî wendene û dima ra Gulîstane Atasoy û Zeyyat Ceylan sey hemserekê HDPyî yê Amedî ameyî weçînayene.