Dima ke esnafê sêrtijî Cemîl Taşkesenî Sereka ÎYÎ Partî Merale Akşener rê vat: ''Tîya Kurdîstan o'' amebi destbendkerdene, Akademîsyenê Zanîngehê Firatî Hifzullah Kutum bi bahaneya vilakerdişê ''Şorişê Êlûle pêro kurdan rê fîraz bo, biciwîyo Kurdîstan' hetê rektorîye ra wezîfe ra ame girewtene û bi îdîaya 'propagandaya rêxistine' tepişîya. Kutum dima vera dîya.

Nê serebûtan ra dima Wezîrê Pawitişî yê Tirkî Hulusî Akarî vat ''Çîyêkê bi nameyê Kurdîstanî çin o.''

Endamê Komîsyonê Ziwanê Kurdkî yê Baroyê Amedî Avûkat Mehmet Arakî ANFyî rê qisey kerd û pare kerd ke ronayîşê Komara Tirkîya ra nata înkar û tedayî dewam kenê.

Arakî da zanayene ke kurdkî û Kurdîstan heqîqat ê ke mumkîn nîyo werte ra wedarîyê. Arakî vat: ''Seba pawitişê kultur, ziwan û erjanê kurdan têkoşînêk esto. La vera nê têkoşînî zî refleksê înkar û çinbîyayîşî estê. Her çî ra ver gelo key sey sûcî dîyeno ke cografyayêke bi nameyê Kurdîstanî bêra pênasekerdene? Madeya 26. ya Qanûnê Bingeyî vana ke vateyê winasênî çarçewa azadîya fikran de yê.''

Arakî îfade kerd ke mesele azadîye ra wetêr ganî sey heq û heqîqatî bêra ercnayene û vat: ''Her çiqas qanûnan de nê çarçewa fikrê azadî de yê zî a raşte azadîye ra wetêr nê heq û heqîqqat ê. Vateyê 'Tîya Kurdîstan o' xora sûc nîyo, heqo xozayî yo. DEwlete seba ke zerrîya nîjadperestan bikera nê merdiman tepişena. La reyna zî nêeşkena raştîya kurd û Kurdîstanî werte ra wedarna. Raştîye heqîqatêko tarîxî yo.''

Arakî bale ante hêrişanê sîstemî yê vera kurdkî ser û vat: ''Ewro pêro dezgehanê dewleyte de têna tirkî yena qiseykerdene. Merdimê ke tirkî nêzanenê zehmetî ancenê, teber de gêrenê çare. Hêrişanê pêroyîyan ra sebeb warê mîyanneteweyî de zî ca nêdîyeno kurdkî. Coka kurdkî têna keyeyan de menda. Pê rayîrê televîzyon û hacetanê îrtîbatî tirkî tesîrê keyeyan keno. Merdim hînî hîsgerîya seba kurdkî war verdeno. Coka ganî kurdkî biba ziwanê fermî û perwerdeyî.''