Leşkeranê Qereqolê Beydoxanî yê Ebexî pê îşkence kolbero kurd Hasan Keçelanlûyî (43) qetil kerdbi û Behnam Semedî (17) zî birîndar kerdbi.

Keyeyê Keçelanlûyî seba ke cenaza Merkezê Tibê Edlîyî yê NÊweşxaneyê Yizyilî ra bigêro muracatê Tirkîya kerd la pê bahenaya Korona muracatê keyeyî nêameyî qebulkerdene.

Selahîyetdaranê Îranî îdîa kerdbi ke wird kolberî qeçaxçîyê merdiman ê la dîmenanê îşkenceyî na îdîa zûr vete. Roja serebûtî têna Keçelanlû û Behnam Semedî nêzdî bîyî û maruzê îşkenceyî mendî. Birayê Semedîyî îdîayê dewleta tirke veng vetî. Komîsyonê Koçberan ê Baroyê Wanî babete girewte, gerreyê leşkeran kerd. Keyeyê kolberan pabeyê paştdayîşan ê.

Semedoke hewteyêl servisê ciewnîyayîşê giranî de mend, serê sînorê Tirkîya û Îranî de ciwîyeno û xeylêk ferdê keyeyê ci kolberîye kenê. Roja serebûtî o û Keçelanlû qexto ke dewe ra şîyî dewêka Beydoganî. Leşkeran ê tepiştî û îşkence kerd. Semedî wina qala serebûtî kerde: ''Serrêke ra nata ez ha kolberîye kena. Mi îfadeyê xo de zî wina vat. Nika ê vanê ma qeçaxçîtîya merdiman kerdêne. Verî înan ma berî qereqolî, cayêkê tarî de verdayî, dima pê panzeran berdî serê sînorî.Uca de ma rê îşkence kerd. Wexto ke mi çimê xo akerd ez rût bîya, embazê mi zî merdbi. Mi xo resna dewêka serê sînor û ez gêraya birayê xo.''

Birayê Hasan Keçelanlû zî vat: ''Cenazaya birayê mi hetê dewleta tirke de ya. Ma qeçaxçîyê merdiman nîyê. Ma seba ke cenaza bigêrê muracat kerd la înan nêdaye. Domanê birayê mi estê. Birayê mi pê îşkence kişîya ganî no bêro cezakerdene. Dîmenan de zî dîyeno ke înan de cixare, kinc û hacetê kaykerdişî estbî. Destê înan de delîlêk çin o ke pê ma seba qeçaxçîtîya merdiman sûcdar bikerê. Ma keyeyêko xizan o. Ma pê kolberîye debarê xo kenê.''

Komeleya Heqanê Merdiman a Wanî zî da zanayene ke ê do dewa teqîb bikerê. Birayê Semedî venga kurdanê Vakurê Kurdîstanî û Tirkîya da ke dewa teqîb bikerê û HDPyî ra zî waşt ke na babete bikerê rojdemê Meclîsî.