Hemsereka Kongreya Komelê Demokratîkî (KCD) Leyla Guvena ke rejîmê tirkî cezaya 22 serran daye ci, goreyê saeta welatî saete 23: 30 de Amed de ameye destbendkerdene.

Guvene verî semedê kontrolê weşîye ameye berdene nêweşxane. Verê nêweşxaneyî de kîtleyo sixletî ame pêser. Yeno pawitene ke  badê berdişê edlîye Guvene bêro berdene hepîsxane.

Guvene  polîsanê ke semedê aye girewtiş eşt keyeyê ci ser, înan rê vat: ''Eke ez biremayêne ruhê şima nêeşnawitêne. Ez qet cayêk nêşina. Ez nê walatî de sîyasetkerdişî rê dewam kena. Zere ya zî teber ferq nêkeno.''

Wekîla HDPyî Merale Daniş Beştaş twitterî ra da zanayene ke Guvene ameye berdene bi Şubeyê TEMî û seba ke dereheqê ci de qerarê 24 saete destbendkerdişî esto do uca de bimano. Beştaşe vat no kerdiş îlegal o û ganî Guvene vejîye mehkeme. 

Hetê bînî ra zaf kesê sey rojnamegere Sabîha Temîzkan, TJA, Hemsereka ÎHDyî Erene Keskîn, Zerrîne Baratay, Pinare Aydinlar, Dîlane Dîrayet Taşdemîr, Perîhane Koca bi tagê 'Leyla Guven rûmetê ma ya' medyaya dîjîtale ser o vera destbendkerdişê Leyla Guven nêrazîbîyayîşê xo mojna. 

TJK-E zî derheqê mesele de eşkerayîyêke daye û îfade kerd ke na bire vera pêro cinîyan ê kurdan ameya girewtene. TJK-E venga pêro cinîyan û kurdan da ke vera destbendkerdişê Leyla Guven ewro vejîyê meydanan û çalakîyan bikerê. TJK-E vat: ''Ma venga her kesî danê ke bibo vengê Leyla Guven. Leyla Guven rûmetê ma ya. Roje roja wayîrvejîyayîşê rûmetî ya.''