Erdlerzî Mereşî tesîrê 11 bajaran kerd. Nînan yew zî Amed û dewê ey bîyê. Licê de mezraya Şurtêmevnî de xeylê banan xesar girewto. Seba ke dewijî nêeşkenê keyeyanê xo de bimanê, nê serdî de çadiran de manenê.

Dewij Mehmet Oyunluyî (78) ard ziwan ke demê erdlerzî de nêeşkîyayo bivejîyo teber û wina vat, ‘‘Dewe ra çîyêk bi kesêkî nêame, la heme banan xesar girewto û rijîyayê. Ez zaf xemgîn bena seba ê kesan ke nas û dostê xo binê xirban de vindî kerdî.’’

Nêeşkenê dekewê keyeyanê xo

Oyunluyî dîyar kerd ke çadirê ke înan rê ameyê erşawitene, karê înan nêvînenê û wina dewam kerd, ‘‘Ma 12 kesî çadirêkî de manenê, hûmara ma zaf a la çadire zaf şenik a. 6-7 domanê şenikî est ê. seba înan zaf zehmet o. Wexto ke varan vareno çadire dalpê kena. Ma çadirêkê nînî erzenê ser o ke wa awe nêro war. Ma seba ke xo bişuwê û hewcedarîyanê bînan, ma dekewenê bananê xo yê xesarinan. Heywanê ma est ê axuran de. Ma seba înan zî çadirî waştî la AFADî nêdayî ma. Ma ra vanê koçê bajarî bikerê. Ma nêeşkenê bajaran ra biciwîyê. Tîya de bostanê ma est ê, ma eşkenê biramê xo rê debarê xo bikerê la bajaran ra eşkenê se bikerê? Ma fek dewa xo ra nêverdanê.’’

Ê agêrayê dewa xo

Oyunluyî erdlerzî 1975î ard vîrardene û wina dewam kerd; ‘‘Serra 1993î de dewa ma ameye veşnayene. Ê zimistanî de ma koç kerd û şîyê Amed. Ma dî ke ma nêeşkenê debarê xo bikerê, ma reyna agêrayê dewa xo’’

Ma çareyêkî wazenê

Dewij  Raîf Yakaciyî (69) zî dîyar kerd ke çadirê ke ameyê erşawitene, karê înan nêvînenê û dewam kerd, ‘‘Ma wazenê ke konteyniran bidê ma. Dewa 18 keye ya. Pêro xesar girewto. Qeymeqamî vat, ‘koç bikerê şêrê Lice yan zî koçê Amedî bikerê ma kîraya şima danê’ ez nêzana no çend rast o la ma qebul nêkenê. Ma heywananê xo kamca de verdê û şêrê? Ma fek dewa xo ra nêverdanê, wa ma rê çareyêkî peyda bikerê.’’

Medîne Yakaci zî vat, ‘‘Şima zî vînenê ke banê ma rijîyayê. Gere banê ma bêrê viraştene. Ma heta key çadiran de biciwîyê? Eke ê eşkenê nê serdî de çadiran de bimanê, ma zî eşkenê bimanê. Eke ê nêeşkenê wa bêrê bananê ma bivirazê.’’

Verê zî seba erdlerzî 2 serrî çadiran de mendo

Mûstafa Yakaciyî (83)  vat; ‘‘Eke dewlete biwaza eşkena banan biviraza. Ma ban wazenê. Erdlerzî ra dima çadiran vêşêr çîyêk nêkerda. Çadiran de ceyran çin o. Ma nêwazenê dewa xo ra şêrê. Ma şêrê kamca? Erdlerzê Çewlikî de zî banê mi xesar girewtbî. Ma di serrî çadiran de mendê.’’