Şingal de tanqêkê leşkerî da wesayîtêkî ro û netîceya qezayî de 2 êzidîyan dîyaya xo bedilnaye û 27 kesî birîndar bîyî. Îdareyê Xoserî yê Şingalî derheqê qewimîyayîşê peyênî de eşkerayîye daye.

Eşkerayîye de nê ameyî vatene: ''Her çiqas sey qezaya normalî bêro mojnayene zî wina nîyo. Cunke wesayîto ke bi sebebê qezayî wesayîtêko leşkerî yo. Ma wazenê rayrapêroyîye rê bidê eşnawtene ke demê peyênî de Şingal de bi seyan wesayîtê leşkerî ameyî cakerdene. Têgêrayîşê leşkerîyî yo pîl yê artêşa Iraqî esto. No qeza zî coka qewimîya. Xora dîmenê ke medyaya sanale de ameyî vilakerdene de ame vînayene ke cayê qezayî de leşkerê Iraqî pê şayîya xo senî ke çîyêkî pîroz bikerî.  Nê dîmenî dişmenîya vera êzidîyan fînenê çiman ver. Wextê fermanî de çeteyanê DAÎŞî pê dîmenanê şehîdanê ma wina şayî kerdene. Ma zî hukmatê Kazimî rê persenê: Qey leşkerê şima pê mergê êzidîyan wina şa benê?

Bi talîmatê hukmatê Kazimî binê nameyê asayîşî de bi seyan wesayîtê leşkerî Şingal de ameyî cakerdene,têgêrayîşo leşkerî esto. Ma zanê ke nê gamê dewamê pêkerdişê 9ê Teşrîna Verêne yê. Şingal de raşta zî cehdkerdişê provokatîfî yê pîlî yenê kerdene. Bi bahaneyanê cîya cîyayan wazenê hêzanê xo yê leşkerîyan Şingal de ca bikerê. Badê vîjnayîşî Iraq de hema hukmato newe nêameyo ronayene.  PDK û hukmatê Kazimî wazenê nê prosesê krîzê sîyasîyî bişuxulnê û verê bidê Şingalî. Çîyo winayên têna xizmet hukmatê Kazimî û PDKyî keno. Feydeyê ci Iraqî rê çîn o.

Provokasyonanê PDKyî ra yew zî eşkerayîyê parlamenterê ci Majîd Şengalî yê. Ma zanê ke o şexsî nê bi nameyê PDKyî qisey keno. Semedê peykerê Şehîd Zerdeşt Şingalî vano 'Ma destûr nêdanê ke kesê ke Şingalî temsîl nêkenê, peykerê înan bêro ronayene.' Reyna bi eşkerayîyanê xo yê bînan de wazeno mabênê dînan û bawerîyan de têmîyankerdiş vejo. Şarê ma û her kes zano ke gama ke Şehîd Zerdeşt Şingalî vera çetayanê DAÎŞî Şingal pawetêne PDK û Majîd Şingalî ferman dûrî seyr kerdêne û ewnîyayêne keyfê xo ra. Kam Şingalî temsîl keno? Êyê ke Şingalî ra remayî ya êyê ke semedê Şingalî canê xo dayî. Majîd Şingalî û kesê sey ey ne eşkene Şingalî temsîl bikerê ne zî bi nameyê ci eşkenê qal bikerê.

Ma tîya ra veng danê heme komelê êzidîyan vera nê kayenê leyminan, zeyxtan, hêrişan ma bibê yew û wayîrê Şingalê xoser û azadî bivejîyê. Ma veng danê hêzanê sîyasîyan ê Iraqî ma sey Îdareyê Xoserî yê Şingalî hetê çareserî de yê. Ma pêkerdişê 9ê Teşrîna Verêne sey pêkerdişê şerî vînenî û qebul nêkenê. Ganî hêzê sîyasîyî yê Iraqî naye vîne û vera ci vejîyê. Şingal reyde pêkewtiş ne pêkerdiş Iraqî keno hêzdar. Ma venga hetkaranê azadîye, hêzanê demokrasîyî û hêzanê mîyanneteweyî danê ke wa paştî bidê Şingalî. Ma reyna şexsê fermadarê xo yê pîlî Şehîd Zerdeştî soz danê heme şehîdanê xo ke ma do Şingalê azad û xoserî heta peynî bipawê.''