Îdareyê Xoserî yê Şingalî derheqê hêrişanê dewleta tirke ya îşxalkere, Peymana 9ê Teşrîna Verêne û hemkaranê dewleta tirke de eşkerayîyêke daye.

Eşkerayîye bi kilmî wina ya:

''Ewro hukmatê Iraqî nêzdîyê rijîyayîşî yo. DAÎŞ newe ra Iraq de xo rêxistin keno. Hêzê ke DAÎŞî bin kerd û êzidîyî yenê hedefkerdene. Bêvengîya Neteweyanê Yewbîyayeyan zî sebebê nê hêrişan a. Tewr peyên Meclîsê Şarî yê Xanesorî dîya bombayan ver û şehîd Merwan Bedel ame qetilkerdene.

Şehîd Merwan Bedelî wexto ke hukmatê Kurdîstanî û Iraqî nêkerd vera DAÎŞî têkoşîn kerd. O fermandarê têkoşînê vera DAÎŞî bi. Nê hêrişê vera Şingalî qesasê DAÎŞî yê. Merwan Bedel keso sîyasetmedar û temsîlkarê êzidîyan bi. Iraqî 3ê tebaxa 2014î de bi hezaran leşkerî xo apey girewtî. PDK êzidîyî destê DAÎŞî de war verdayî.Xêrê xoverdayîşê gerîlayan û YBŞyî ra êzidîyî xelisîyayî. Peymana 9ê Teşrîna Verêne ra nata nêzdîbîyayîşê hukmatê Iraqî yê bi dewleta tirke vurîya. Iraqî şarê ma fermanî ra nêpawit û nika zî vera hêrişan bêveng o. O çax çi gureyê Iraqî Şingal de esto? Şarê ma vera bêvengîya hukmatê Iraqî hêrsbîyaye yo û protestoyan keno. Ma pê nê tewirê şarê xo sereberz ê.

Ma venga Neteweyanê Yewbîyayeyan danê ke wezîfeyê xo bîyarê ca, vera hêrişan tewirê xo bimojnê.  Ma vera bêvengîya hukmatê Iraqî 12ê kanûne de nêverda ke dezgehê hukmatî abibê. La 13ê kanûne de ma hînî destûrê destpêkerdişê karî da. No nêno a mana ke ma nê hêrişan qebul kenê.

Kesê ke vera Şingalî xebitîyenê, bi taybetî medyaya PDKyî ganî ziwanê dişmenîye ra fek vera bidê. PDK şarê ma kampan de esîr keno û hêrişanê vera êzidîyan pê eşkerayîyan keno meşrû. La kerdişê do nêeşkê bikerê ke ma Şingalê xoserî ra fek vera bidê. Şingalo Xoser destkewteyê şarê ma yo û armancê ma yo. Ma soz danê ke hînî çew nêeşkeno komelê ma goreyê xo dîzayn bikero. Bedelê ci çita beno wa bibo ma do rêçê şehîdanê xo de bibê. Ma do Şingalê Xoserî ra fek vera medê û xo ver bidê.''