Mazlûm Dag û Mihemed Beşîksîzî bi îdîya ke 17ê temmuza 2019î Hewlêr de îdarekarê MÎTî Osman Kose, Nerîmane Osman û Beşdar Remezan kiştê ameybî tepiştene û înan rê cezaya dardekerdişî dîyaye. Eşkera bi ke Mudirîya Pêroyî ya Asayîşê Mazlûm Dag û Mihemed Beşîksîzî rê gefê kiştişî wend.

Dag û Beşîksîzî wexto ke pê telefonî keyeyê xo reyde qisey kerd qala babete kerde. Keyeyan îfade kerd ke verê cû domananê înan vera binpaykerdişê heqan û gefan dest pê çalakîya grevê vêşanîye kerdbi û dima ke selahîyetdaran soz da ke ê do teda û zorbazîya vera înan biqedînê çalakîya xo ra fek vera dabi.

Keyeyan ard ziwan ke çalakîye ra dima binpaykerdişê heqanê merdiman zêdîyayî. Dag û Beşîksîz hucreyê yewkesî de ameyî cakerdene û înan rê îşkence ame kerdene. Keyeyan da zanayene ke selahîyetdaranê asayîşî domananê înan rê vat: ''PKK dişmenê ma yo, şima zî esîrê ma yê. Ma şima tîya de bikişê çew pê nêhesîyeno.''

Keyeyan pare kerd ke hêrişê vera Zînî Wertê ra dima hêrişê domananê înan ame kerdene, rojêke de têna eşkenê 2-3 deqayan şorê lawabo, nêverdenê domanê înan televîzyon seyr bikerê, kitab û radyo nêdanê înan.

Keyeyan îfade kerd ke eke wina dewam bikero domanê înan do dest pê rojeyê mergî bikerê û vat: ''Ganî kurdî vera nê kerdişan bêveng nêmanê. No tewirê Îdareyê Herêma Kurdîstanî nêno qebulkerdene.''