Koyê Bagokî yê qezaya Nisêbînî ya Mêrdînî de 11ê kanûne ra heta 15ê kanûne de hêrişê leşkerî ameyî kerdene. Netîceyê hewayê hêrişî de 6 gerîlayê YJA Starî şehîd bîyî.

Cenazayê Denîze Orak (Hîra) û Sîmanure Kaya (Meskene) hetê keyeyanê înan ra ameybî girewtene û Artuklu û Nisêbîn de ameybî definkerdene. 4 cenazayî hema morg de manenê. Vizêr yewna keyeyî semedê girewtişê cenaza muracat kerd. Keyeyê Fatma Çîçekî ke Amedî ra ame Mêrdîn. Seba ke cenazayî ameyî yew hale ke nînê şinasnayene, keyeyê Çiçeke nêeşka cenazaya xo teşhîs bikero. Merdimanê Çîçeke semedê testê DNA gonî daye û agêra Amed.

Keyeyê Betule Dîlen (Dîcle) zî Erziromî ra amebi Mêrdîn û seba ke nêeşka cenaza teşhîs bikero semedê testê DNA gonî dayebî. Eke heta roja peyêne ya kanûne netîceyê testê DNA nêrê û cenazayî nêrê girewtene do Goristanê Bêkesan ê Artukluyî de bêrê definkerdene.