SÎHAyanê tiirkan vizêr merkezê Komelgehê Xanêsorî de wesayîtêk hedef kerd û netîceya hêrişî de Hemserekê Konseya Rayberdişî yê Şingalî Merwan Bedel ame qetilkerdene. Hemserekîya Meclîsê Rayberdişê Xoserî yê Şingalî bi eşkerayîyêke hêrişê vera Şingalî şermezar kerdî û pare kerd ke mesuldarê nê hêrişan Iraq û PDK yê.

Eşkerayîye de ame vatene ke hêriş roja fîraze de roja yewîne ya rojeyê Êzî de ame kerdene: ''Embaz Merwan seba amadekarîyanê roşanî, seba ke domananê xo bero bazarî keyeyî ra vejîyabi. Wexto ke hêriş ame kerdene Dinya Merwan (11) û Dîcle Merwan hetê ey de bîyî. Ma zanenê ke dişmena kurdan dewleta tirke qestî ra na roje weçînaya. Armancê dişmenî o yo ke roja ma ya fîraze seba ma bivurna roja reşe.

No hêrişê berdewamîya şehîdkerdişê Mam Zekî, Şehîd Zerdeşt û Şehîd Seîd Hesen a û parçeyê peymana 9ê Teşrîna Verêne ya. Dişmen wazeno êzidîyançin bikero. Çunke êzidîyî wazenê bi îradeyê xo yê azadî, erdê xo yê fîrazî de xo îdare kenê. Embaz Merwan bi xo rayberanê komelê êzidîyan ra yew bi. O vera DAÎŞî vindertbi û roja destpêke ra tewrê YBŞyî bibi. Ey pêro emrê xo de xîret kerd ke Şingal bipawo.

No hêriş her çiqas pê destê dewleta tirke ameyo kerdene zî mesuldarê ci hukmatê Iraqî yo. Tewirê Iraqî ra dewleta tirke tim hêrişê Şingalî kena. Na bêvengîye û hemkarîya hukmatê Iraqî cesaret dana dişmenanê ma û verê hêrişan akenê. Hetê bînî ra ma nê hêrişan ra PDK sey mesuldarî vînenê. Xora PDK estbîyayîşê xo estbîyayîşê dewleta tirke ya îşxalkere de kerd yew.PDKyî tim dezgehê êzidîyan û rayberê komelê ma hedef mojnayî. Êyê ke Şingalî hedef mojnenê mesukldarê nê hêrişî yê.

Qet yew hêriş nêeşkeno ma têkoşînê Şingalê xoserî û azadî ra dûrî bivisno. Ma benga pêro êzidîyan danê ke her wextî ra zêdêr wayîrê îradeyê xo vejîyê. Ma venga pêro şarê xo danê ke siba tewrê merasîmê definkerdişê Merwan Bedelî bibo û cewabêkê xurtî bido dişmenî. Merwan Bedelî heta şehadetê xo seba Şingalî kede daye. Ma pê bawer ê ke şarê ma do wayîrê ci vejîyo.''