Mexmûr de bi aktîvîteyêke serrgêra 44. ya ronayîşê PKKyî ameye pîrozkerdene. Konvoyê wesayîtanê ke verê Komîteya Keyeyanê Şehîdan de ame pêser heme kampe ra gêra. Şarî pê slogananê ''Biciwîyo Serek Apo'', ''Biciwîyo Partîya Karkeran a Kurdîstanî'' û ''Biciwîyo 27ê Teşrîna Peyêne'' konvoy verwazî kerd.

Şaro ke Parka 4 Nîsane de ame têhet verî semedê şehîdanê têkoşînê azadîye rêz girewt. Dima ra ciwanan adir nata û dormeyê ci govende girewte. Govend Bulutî ke bi nameyê ciwanan qisey sere de roja ganîbîyayîşî Rayberê Şarê Kurdî Abdullah Ocalan û şarê kurdî rê pîroz kerd, şehîdî yad kerdî û vat: ''Ewro gerîlayê Rayber Apoyî vera îşxalkeran şerê tarîxî kenê. Têkoşînê ke 27ê Teşrîna Peyêne ya 1978î vera faşîzmê dewleta tirke sey çîqê adirî ame destpêkerdene ewro serkêşîya gerîlayan de çar leteyanê Kurdîstanî de sey adirê azadîye vila beno. 43 serran de bedelê pîlî dîyayî la xeta Rayber Apoyî ra çirey peyser game nêameye eştene.  Ma sey ciwananê kurdan vanê ke ma ciwan dest pêkerd, ma do ciwan ser bikewê. Serra 44. de ma do têkoşînî pîlêr bikerê û ser bikewê.''