96 şaredarîyanê DBP’yî yê ke bi destê qeyûman hetê rejîmê AKP-MHP’yî ra ameyî destesernayene înan ra yewe zî Şaredarîya Dêrsimî ya. Seba şaredarîya ke amîya destesernayene newe ra teslîmê şarî bêro kerdene HDP, DBP, ESP û Partîzanî Yewîya Hêzê Şorişgêrî awan kerde. Xebatê weçîntişî yê yewîye bi xurtî dewam kenê.

 ‘Serkewtişê Weçînitişî Hendî Meseleyêkê Anorî Yo’

Namzedanê Yewîya Hêzê Şorişgêrî ya Dêrsimî yê hemşaredarîye Nûrşat Yeşîle û Hidir Demîrî ANF’yî rê qisey kerd.

Namzedan ra Nûrşat Yeşîle kedkarêka weşîye ya ke dimayê 16 serranê hemşîretîye wextê Halê Nealeladeyî de bi qerarnameyê hukmê qanûnî de bi hawayêkê nêhuqûqîyî kar ra ameya eştene. Yeşîle Dêrsim de ameya dinya, bîya pîle û demêk hemserekîya Şaxî ya SES’î kerde. Yeşîle ard ziwan ke Dêrsim de îradeyê şarî ameyo destesernayene, serkewtişê weçînitişî hendî ferzêk o û vat, “Serkewtişê ma yê nê weçînitişî verê her çîyî meseleyêkê anorî yo.”

Yeşîle ard ziwan bi tayînkerdişê qeyûman polîtîkayê asîmîlasyonî Dêrsim de bîyî vêşî û vat ke karo ewilên ê qeyûmî o bi ke motîfanê Osmanî û Selçûkîyan ê ke hemverê kulturê şarê Dêrsimî de yê her cayanê bajarî de bi ca kerdî.

Yeşîle da zanayene ke şaredarî nika agêraya cayê qereqolî û ard ziwan ke xeylî şar rîyê nê atmosferê zordarî ra bi mengan o nêşinê şaredarîye. Yeşîle vat naye ra no 2.5 serrî yo a nêşîya şaredarîye û vat, “Şaredarî merkezê bajarî de ya, la bi temamî bajarî ra dûr kewta. Merdimî nê halî ra aciz ê, nêwazenê şirê şaredarîye. Çunke şaredarî hendî şaredarîya şarî nêya.”

Yeşîle ard ziwan ke hem rîyê sebebanê ekonomî ra hem zî rîyê polîtîkayanê asayîşî ra merdimî Dêrsim ra koç kenê û vat, “Ziraro ke polîtîkayanê ‘asayîşî’ dayê afernayîşê aşitîye eşkeno bêro halkerdene. Hemverê problemê bêkarîye de zî ma wazenê ke cayanê qijkekan ê karî awan bikerê. Mehlayan de bi awankerdişê kargehanê qijkekan ê tekstîlî, bi akerdişê kreş û stargeyê kokiman ma do cehd bikerê ke cayanê karî bikerê vêşî. Heman wextî de ê kesê ke wazenê heywankarî bikerê zî ma do paştî bidê înan.”

‘Yan Demokrasî Yan Zî Rejîmê Yew Şexsî’

Yeşîle bale ante seba ke bieşkê vernîya polîtîkayanê asîmîlasyonî yê ke bîyê sîstematîk bigêrê, seba ke îradeyê şarî yo ke ameyo destesernayene newe ra teslîmê şarî bêro kerdene a bîya namzede û vat şar zano ke no weçîntiş sey weçînitişanê verênan nêyo.

Yeşîle da zanayene weçînitşanê 31’ê Adare de reydayîş do mabênê demokrasî û rejîmê yew şexsî de ravêro û vat, “No weçînitiş seba dewamkerdişê îqtîdarê înan problemêkê mendiş û nêmendişî yo. Seba ma zî meseleyêkê ameyoxî yo ke ma bieşkê faşîzmê AKP-MHP’yî zihîf bikerê û wareyê cayîyî de azadî û demokrasîyî bi dest bifînê.  Ma do qetîyen bi ser bikewê.”

‘Ma Do Pîya Vernîya Nê Şîyayîşî Bigêrê’

Namzedê Yewîya Hêzê Şorişgêrî ê hemşaredarîya Dêrsimî Hidir Demîrî zî ard ziwan ke amacê înan o ewilên zihîfkerdişê rejîmê yew şexsî yê AKP’yî yo û bi nê hawayî wazenê îradeyê şarî yo ke ameyo destesernayene newe ra teslîmê şarî bikerê.

Demîrî vat, “Seba bicaardişê rejîmê şexsêk, Dêrsim nika sey laboratûwarêkê qijkekî yo. Erkê tîyayî heme destê walîyî de yê û zerrîya ê çi biwazo keno. Gama ke zerrîya ci wazena ferman dano ke ramitoxê mînîbuse cayê xo ra peya bo bêro warî, yan zî seke vizêr qewimîya; ciwanê ke destê ê nêgirewtî tavilî destebend kerdî. Naye ra ganî no nizdbîyayîşo zordar o ke şarî nêşinaseno şaredarîye ra bêro eştene. Waştişê şarî yo tewr pîl ma ra no yo ke no hal tavilî bêro vurnayene. Karê ma yo sereke no yo ke heqê merdiman ê bingeyênî yê ke ameyê binpaykerdene newe ra awan bikerê û zerrîya şarî asan bikerê. Ma do nê fehmê îdareyê dewlete yê zordarî zihîf bikerê. Ma do seba afernayîşê şaredarîyêka şarperwer û demokratîke mucadele bidê.”