Merkezê Îrtîbatî û Çapemenîye yê HPGyî nasnameyê 2 gerîlayanê ke Garzan de şehîd bîyî eşkera kerdî. Eşkerayîye wina ya:

''Menganê hezîrane û êlule de dewleta tirke ya kolonyalîste warê Garzanî de xeylêk reyî operasyonî kerdî û nê operasyonan de mabênê hêzanê ma û artêşa tirke ya îşxalkere de pêkewtişî qewimîyayî. Îşxalkerî nê pêkewtişan de vera hêzanê ma yê gerîlayan ser nêkewtî û çend reyî war da bombayan ver. Nê bombardumanan de embazê ma Dilgeş û Erdalî xoverdayîşê vera dişmenî de çêrîya pîle mojnaye û şehîd bîyî.

Nasnameyê embazanê ma yê şehîdan wina yê:

Nameyê Qodî: Dilgeş Şerzan Name û Peyname: Mahmut Ozdemîr Cayê Bîyayîşî: Mêrdîn Maye-Pî: Sevîme – Haşîm Tarîx û Cayê Şehadetî: 20ê Hezîrana 2021î / Garzan

Nameyê Qodî: Erdal Şoreş Name û Peyname: Mahsum Yasak Cayê Bîyayîşî: Sêrt Maye-Pî: Gulê – Beşir Tarîx û Cayê Şehadetî: 20ê Êlula 2021î / Garzan

Embaz Dilgeş Nisêbîn de dadîya xo ra bîyo. Ey nêzdî ra şahîdîya qirkerdişanê dewlete kerde û 2011 de vera hêrişanê sîstematîkan ê dewlete verê xo da koyanê Kurdîstanî. Embaz Dilgeşî Cîlo de dest pê gerîlatîye kerd û bi gerîlayêko marîfetîn. Ey tim xîret kerd ke xo aver bero û têkoşînê Vakurî xo rê esas girewt. Embaz Dilgeşî wextêko derg warê Garzanî de pê kesayetê xo yê fedakarî xebatê gerîlayan kerdî, pêro wezîfeyê xo ardî ca û tim semedê wezîfeyî vazda. O pê nê taybetmendîyanê xo bi mazharê herkerdişê embazanê xo.

Embaz Erdal Sêrt de dadîya xo ra bîyo. Embaz Erdal şehadetê ferdanê keyeyê xo û cigêrayîşan ra dima 2014 de Botan de tewrê gerîlayan bi. Wextêkî ra dima o derbazê herêma Garzanî bi. Embaz Erdal cade gerîlatîya Vakurî musa û bi fermandarêko ciwan. Ey Garzan de xeylêk çalakîyanê serkewteyan rê rayberîye kerde û 7 serrî bêmabên têkoşîn kerd. Ey Garzan de morê xo da binê xeylêk serkewtişan û wezîfeyê xo ser de şehîd bi. Têkoşîn û tewirê embaz Erdalî do tim hetê embazanê ci ra sey mîsal bêrê girewtene û do tim sey fermandarêkê çêrî yê Garzanî bêro yadkerdene.

Embaz Dilgeş û Erdal pê tewirê xo yê milîtanîya Apogîre û terzê xo yê têkoşînî tim embazanê xo rê bibê mîsal. Ma sere de keyeyanê înan ê ercîyayeyan rê pêro şarê welatperwerî yê Kurdîstanî rê serweşîye wazenê. Ma reyna soz danê ke têkoşînê azadîye yo ke embazan dewrê ma kerdo qetî bi serfîrazî biqedînê.''