Navda Dînçe emrêkê ciwanî de tewra Têkoşînê Azadîye yê Kurdîstanî bîye û 2016 de Gever de xoverdayîşê xoîdarekerdişî de şehîd bîye. Cenazaya Navda 5 serran ra dima dîyaye keyeyê aye.

Keyeyê Navda qala domanî û ciwanîya aye ANFyî rê kerde. Navda wexto ke Îstanbul de bîye rojêke keyeyî ra vejîyena û hînî anêgêrena. Wextêkî ra dima keyeyê xo rê vana ke ha ça de ya.

Dadîya Navda Sebahate Dînç wina qala kênaya xo kerde: ''Navda domanîya xo de zî wayîra îradeyî bîye. A hem Amed de hem zî Îstanbul de xebitîya, karê tekstîlî û peyzajî kerdî. Aye wextêkî ra dima têkoşîn de ca girewt. Şewêke aye vat wazena tewra karê ciwanan biba. Ma zî paştî daye ci. Şewêka zimistanî zî vat 'Ez şina şaristanêkê bînî, çend mengan uca de manena.' Mi vat eke verê çimanê ma de biba hîna hol bena la aye bira xo daye û şîye.
Rojêke ma keyeyê xo boyax kerdêne. Coka ez şîya keyeyê apê xo. Mi Naavda ra telefon kerd vat wa bêra uca. Vat 'belkî ez yena, belkî zî nêna.' Mi fam nêkerd. 2-3 rojî a nêameye keye. Ma embazanê ci rê pers kerd. 3 rojan ra dima rojêke Naavda ma rê telefon kerd û vat aye verê xo dayo koyan. Mi tira va wa rayîrê ci akerdo bo. Navda pêro emrê xo de çi bire daye, çi gure û xebat waşt qetî ard ca.''

Navda 16 serran gerîlatîye kerde. 2016 de Gever de tewra xoverdayîşê xoîdarekerdişî bîye. Navda nê xoverdayîşî de bi hawayêkê bêhemparî şer kerd û şehîd bîye. Cenazayê endamanê YPS û YPS-JIN o çax Goristanê Bêkesan ê Erziromî de ameyî definkerdene. Keyeyê Dînçî 5 serran ra dima nê rojan de cenazaya kênaya xo girewte û Amed de Licê de defin kerde.

Babî Dînçî 5 serran semedo ke cenazaya kênaya xo bigêro têkoşîn kerd. Babî Dînç wina qala ê rojan kerde: ''Ma televîzyonî ra musayî ke Navda şehîd bîye. Ez şîya Meletî dima zî şîya Erziromî. Dezgehê Tipê Edlî yê Erziromî de xebatkarêkî mi rê vat 12 cenazayî goristanê bêkesan de ameyê definkerdene. Ez şîya dozgerîye. Mi gonîye daye. 2 serran înan xebere nêdaye ma. Înan tim ma meşxûl kerdî, mi rê vatêne 'babîyê terorîste' û vatêne dosya vînîbîyaye ya.''

Keyeyî 11ê teşrîna peyêne de goristanê bêkesan ê Erziromî ra cenaza girewte û qezaya Licê ya Amedî de defin kerde.