Hêzanê Nesir El Mubînî pare kerd ke vizêr hêrişê teyarayanê dewleta tirke yê vera Şingalî de sivîlêk şehîd bi û şerwanêkê înan zî birîndar bi. MÎT û PDK sey berpirsîyaranê hêrişî ameyî mojnayene.
Hêzanê Serkewtişî yê Şingalî (Nesir El Mubîn) derheqê hêrişê vizêrinî yê teyarayanê dewleta tirke yê vera Şingalî de eşkerayîyêke weşanaye.
Eşkerayîye de ame parekerdene ke dewleta tirke vizêr şan saete 18:30 de bi SÎHAyan hêrişê herême kerd.
Eşkerayîye de wina ame vatene: ''Netîceya hêrişî de sivîlo ke karê sondajî kerdêne dinyaya xo bedilnaye û şerwanêkê înan zî birîndar bi. No hêriş raşta raşte hetê MÎT û PDKyî ra ame kerdene. Hêriş dewamê pêkerdişê dewleta tirke û PDKyî yê 9ê teşrîna verên o.
Ma reyna venga PDKyî danê û ey hîşyar kenê. Wa hînî dişmenê şaran ê bindestan rê dostanîye mekero, şarê Şingalî rê dişmenîye nêkero. Fermanê 3ê tebaxa 2014î ra dima PDKyî bi hawayêkê fermîyî 2 reyan hêrişê Şingalî û hêzanê ma kerd. Reyna bi hemkarîya PDKyî bi desan reyan herême ser o hêrişê hewayî ameyî kerdene. Nê hêrişan de 10 embazê ma şehîd bîyî.
Ma tim xîret kenê ke Şingal bikerê herêmêka biasayîş û arame. Ma heta nika qet nêwaşt ke zerarêk bireso dewaya kurdan. La eke PDK dişmenîya xo de israr bikero ma do vera ci şer bikerê. Ma reyna vanê ke wa PDK hînî nê kerdişan war verdo.''
