Rojnameger Nîhat Kayayî îtîfaqê PDK û AKP-MHPyî, sewqîyatê leşkeran ê Garê û hêrişê PDKyî vera hêzanê bînan ANFyî rê ercnayî.

Nîhat Kayayî ard ziwan ke hêrişê PDKyî yê vera Herêmanê Pawitişî yê Medya newe nîyê û na rewşe Zînê Wertê de zêdêr eşkera bîya. Kayayî vat: ''La roje bi roje seba îşxalê Başûrî rolê PDKyî zêdîya. Hêrişanê DAÎŞî yê 2014î de PDK zaf waran ra bi taybetî Şingalî ra rema. Coka çimanê kurdan de prestîjê PDKyî kêmîya. Nê prosesî de PKK vejîya vernî. PDK zî pê naye qayîl nîyo. PDKyî seba ke newe ra bitesîr bibo referandumê xoserîye ard rojdem. PKKyî yewîya neteweyîye viste werte la PDKyî xoserîye viste. La referandumî ra dima xeylêk erdê Başûrî destê kurdan ra şi. Bi nê hawayî fikrê referandumî zî karê PDKyî rê nêbi.''

Nîhat Kayayî pare kerd ke PDK referandumî ra dima seba ke sey verî bihêz bibo kewt peyê cigêrayîşan û vat: ''PDKyî paştî daye tasfîyeyê HDPyî, îşxal û tecrîdê Rojawanî de cagirewt. Yanî PDK seba bêtesîrkerdişê Têgêrayîşê Azadîye dewleta tirke reyde têgêra. Ewro Garê de sey Xakurkê û Zînî Wertê PDK konseptê ablûqaya PKKyî ano ca. Hamleyê Şingalî û ekonomî zî parçeyêkê nê konseptî yê. Îtîfaqê PDK û AKP-MHPyî kurdan rê yew fayde nêdano. PDK paştîya xo dano SÎHA û ÎHAyanê dewleta tirke û PKK keno hedef. La PKK ewro herême de hêzo dînamîk ê şaran o.''

Kayayî da zanayene ke kurdî ganî tarîxî ra ders bigêrê û vat: ''PDK yewîya kurdan herimneno.Heta ke no tewirê PDKyî nêvurîyo kurdî do nêeşkê yewîya xo bîyarê ca. Eke kurdî nêwazenê seserra 21. de bin bikewê ganî PDK pozîsyonê xo zelal bikero.''