Kongreya Komelê Demokratîkî (KCD), Partîya Herêmanê Demokratîkan (DBP), HDP û Komeleyanê Elewîyan ê Demokratîkan (DAD) seba nuştox Haydar Işiko ke 17ê kanûna 2021î de şibi heqîya xo salona Şaredarîya Dêrsimî de merasîmê yadkerdişî serûber kerd. Hemserekê KCDyî Berdan Ozturk, domanê Işikî Yuksele Mutlu û Murat Işikî, Wekîlê HDPyî yê Dêrsimî Alîcan Onlu, îdarekarê DADî, HDPyî û Partîya EMEKî zî tewrê merasîmî bîyî.

Deqayêkê rêzgirewtişî ra dima Endamê Meclîsê HDPyî Nesîmî Adayî qala cuya Işikî wende. Merasîm de derheqê Işikî de sînevîzyonêk ame mojnayene.

Dima Berdan Ozturkî qisey kerd û vat: ''Haydar Işik sey domanê kurdan û Kurdîstanî mojna ke ganî tewiro rûmetên senî bo. Ma şexsê Haydar Işik û Sarayan de soz danê ke têkoşînê xo rê heta azadîya kurdan û Kurdîstanî dewam bikerê.''

Keynaya Işikî Yuksele Mutlu zî merasîm de qisey kerd û vat: ''Babîyê mi wexto ke nêweş bi tim halê Dêrsim û Kurdîstanî pers kerdêne. Ey vatêne ganî ma wayîrê xoza, erd, bawerî û ziwanê xo vejîyê. Emrê ci pê têkoşînî vîyart. Hêrişê vera cenazaya dadîya Aysele Tugluk ra dima ey vatbi 'Ez nêwazena şora erdêkê winasênî ser. Wexto ke erdê ma azad bi mi kişta dadîya mi de defin bikerê.''

Merasîm pê deyîranê ke Işikî pa hez kerdêne qedîya.