Endamê Meclîsê Xoserîya Demokratîke ya Şingalî û Hemserekê Meclîsê Şarî yê Duhala Salih Êzidîn Xeloyî û dayîka bi nameyê Hemşê Reşîd derheqê hêrişanê vera Şingalî de ANFyî rê qisey kerd.

Endamê Meclîsê Xoserîya Demokratîke ya Şingalî û Hemserekê Meclîsê Şarî yê Duhala Salih Êzidîn Xeloyî da zanayene ke hêrişê vera Şingalî netîceya hemkarîya Tirkîya, Iraq û PDKyî de ameyî kerdene. 

Xeloyî vat: ''Çira PDK seba Kerkûkî pêvînayîşan nêkeno? Ma de zerd petrol ûsn çin ê. Nê çîyî Kerkûk de estî. Çira şima Kerkûkî ra remayî? PDKyî 3ê tebaxa 2014î de ma rê vat o do ma bipawo. La înan ma war verda û remayî. Ma qirkerdişî reyde têrî mendî. Ewropa seba pawitişê êzidîyan çekî dayî la PDKyî nê çekî dayî cergan. Ewro meclîsê ma, hêzanê ma yê pawitişî yê sey YBŞ û YJŞyî, çekê ma estê. La reyna zî ti (PDK) belayê xo danî ma ro. Ma naye qebul nêkenê. Heta peynîya gonîya xo ma do xo ver bidê. Wa her kes hol bizano ke teyarayê ke hêrişê ma kenê, Tirkîya ra nê Başûrê Kurdîstanî ra yenê.''

Dayîke Hemşê Reşîd zî vat: ''Ma teyarayanê Erdoganî ra nêtersenê. Ma hêrişanê ey şermezar kenê. Domanê Êzidxanî mal û wareyê xo pawenê. Ê vera domananê ma hêrişan zî bikerê ma do xo ver bidê. Her ke teyarayê înan hêrişê Şingalî kenê rêxistinîya ma bena xurtêr.''