Karkerê Kampa Multecîyan a Şehîd Rûstem Cûdîyî (Mexmûr) wexto şîyêne Hewlêr hetê Asayîşê PDKyî ra tepişîyayî. Wird karkeranê ke dima vera dîyayî, da zanayene ke Asayîşê PDKyî zîndan de înan rê bi hawayêkê xirabî têgêra.

Karkerê bi nameyê Mahîr Sêrtîyî vat: ''Asayîşî ma berdî Asayîşê Pêroyî yê Hewlêrî. Ma uca de 25 mendî û xeylêk zehmetî antî. Ma erzîyayî koxûşan ke tede 55 tepişteyî estbî. Mîyanê nê tepişteyan de cergê DAÎŞî zî estbî. 3 saetan lîng û destê ma girêdaye mendî. Wexto ke înan ma berdî îfade dest û lingê ma kelemçe kerdî. Wextê îfadeyî de zî înan pê ma heqaret kerd. 25 rojan ra dima ma sewqê zîndanê bînî bîyî û uca de zî ma 15 rojan mendî. Destûr nêame dayene ke ma xebere bidê keyeyanê xo, înan de qisey bikerê. Seba veradayîşî ma ra 1 mîlyon pere ame waştene. Ma vat ke ma karker ê nêeşkenê hende pereyan bidê û înan ma ra 200 dolar girewt. Ma teslîmê Asayîşê Koyî bîyî. Asayîşê Koyî zî pê bedelê pereyî ma vera dayî.''

Karkerê bînî yê bi nameyê Eşref Korhanî zî vat: ''Înan kincê ma vetî û lingê ma girê dayî. Ma erzîyayî koxûşê 55 kesan û her kes serê erdî de rakewtêne. Hend rojan ra dima ma teslîmê asayîşê Koyî yê YNKyî ameyî kerdene. Serrêke û nême ra nata rayîrê ma girewte yê. Ma karker ê, sivîl ê. Ma nêzanenê ke çira ê ma rê wina kenê. Ma wazenê hînî wa ma rê îxanet nêkerê. Senî tirkan rê dostanîye kenê wa ma rê zî wina dostanîye bikerê.''

Nika ra verî PDKyî 20 roniştoxê kampe tepiştbî.