Endamê Komîteya Rayberdişî ya PKKyî Murat Karayilanî û Fermandarê Qerargehê Merkezî yê Pawitişê Şarî Murat Karayilanî cewab da persanê Yenî Ozgur Politika.

Qiseykerdişê Karayilanî ra beşo pancin bi kilmî wina yo:

''Şîyayîşê pêşmergeyan ê ver bi Kobanê motîfêko neteweyî bi, sembolîk zî bi hol bi. Şarê ma rê moral bi. Tay komê ereban zî tewrê Şerê Kobanê bîyî. Mîsal Şehîd Ebû Leyla wina bi, ey pêro hemleyan de ca girewt. Reyna têgêrayîşanê sosyalîst-şorişgêran ra xeylêk şerwanî tewrê xoverdayîşî bîyî. MLKPyî ra şehadetê pîlî bîyî. Xûlasa bingeyê paştdayîşê enternasyonalî de şerwananê ereb, tirk û kurdan şer de ca girewt. Wextêkî ra dima çalakîyê fedayîyî vejîyayî vernî. No xoverdayîş xêrê embazanê fedayîyan ra aver şi û ser kewt.

Embaz Fermandar Gelhatî nê prosesî de bi hawayêkê aktîfî şerwanî îdare kerdî, vera pozîsyonê hêrişî afernayî.  Çîyanê winasênan Kobanê de ruho bêmexlûb ê Apogîr bihêz kerd, aver berd. Xora nê pêro bingeyê xo Rayber Apoyî ra gênê.  Şerwanan verî DAÎŞ vindarna, dima keye bi keye Kobanê kerde pakî. Çimeyê şerwanan ê îlhamî îdeolojîya Rayber Apoyî bi. Embaz Gelhatî 29ê teşrîna verêne ya 2014î de şehîd bi la embazan terzê ci rê dewam kerd û prosesê pakîkerdişî dest pêkerd.

Ma embazan rê pêşnîyaz kerdêne ke wa parçe parçe cergan bigêrê binê ablûqa û bin bikerê. La embazan vatêne 'hêzê ma hende çin o.' La beno ke prosesê pakîkerdişî bi serran dewam bikerdêne. Ma takwîyeyî şawitî, embaz Masiro zî derbazê Miştenurî bi. Operasyon do şewa 29ê teşrîna peyêne de biameyêne kerdene. Embazî do bişîyêne taxanê binan, DAÎŞ bigirewtêne binê ablûqa û uca pakî bikerdêne. La ecêb o meger DAÎŞ û MÎTî zî seba a roje planêk viraşto. Heta a roje înan Rayberîye de pêvînayîşêk eyar kerdo. Înan rayaumûmîye rê xebera pêvînayîşî zî kerdbi. Înan şewa 29ê teşrîna verêne planê binkerdişê Kobanê kerdo. Yanî goreyê planê înan eke ê biresayêne armancê xo do hîna bihêz vejîyayêne verê Rayberîye.

Goreyê planî wesayîtêko bombakerde berê sînorî yê Murşîtpinarî ra derbaz bibîyêne, sînorê Kobanê de do biteqîyêne, dima cergî do têbigêrayêne û xeta Kobanê bin bikerdêne. Yanî planê înan û planê ma hetê wextî û metodî ra mendêne pê. Şewe saete 3 de mi embazan rê telefon kerd, o çax vengêko pêt ame. Embazî vat teqayîşêko pîl bîyo. 10 deqayan ra dima ma reyna embazî rê telefon kerd. Eşkera bîyo ke wesayît berê Tirkîya ra derbaz bîyo, cayê nobete yê YPGyî de teqayo. La o çax şerwanê YPGyî çarçewa planî de têgêrayêne û uca de nêbîyî.

YPG û cergê DAÎŞî Miştenur de yewbînan vînenê û dest pê pêkewtişî kenê. Berê sînorî de teqayîş de şehadetî qewimîyabî la zaf nêbîyî. Embazan ber war nêverda. Pêkewtişî heta serê sibayî dewam kerd. DAÎŞ goreyê planê xo nêeşka aver şêro. Roje zî pêkewtişî dewam kerd. Hêzanê YPGyî hêriş kerd û Murşîdpinar de da cerganê DAÎŞî ro. Roja bîne cerganê DAÎŞî xo aepy girewt. O çax Tirkîya xeberêke şawite û vat: 'Ne şima ne zî ê mîyanê sînoranê ma de mekewê pê.' No plano hemkar ê DAÎŞ û MÎTî bi, xebera Erdoganî pa estbîye. A roje Rayberîye reyde pêvînayîşêk estbi. A roje girseyê Vakurî zî nêzana ke se bikero. Coka hetê Vakurî de girse zaf tênêgêra. Dîmenê pêkewtişê Murşîdpinarî zî estê ke dokumentêko qetî yo.

Planê DAÎŞî bin kewt. Ney moral da şerwanan la DAÎŞ bêhêvî kerd. Pê pêkewtişê 29ê teşrîna peyêne Xoverdayîşê Kobanê resa astêka bîne. Ney tesîrê Koalîsyonê Mîyanneteweyî zî kerd çunke naye ra dima paştdayîşê hewayî zêdîya. Kobanê kewte prosesê azadbîyayîşî. Taktîkê ma zelal bi. Dima hêzê Kobanê game bi hame aver şîyî û heta 26ê çeleyî pêro cergî eştî. Bi nê hawayî planê DAÎŞ û AKPyî yê vera Kobanê bin kewt. Dima ke merkezê Kobanê xelisîya dewan de şer dest pêkerd. Çunke DAÎŞî dewan de zî şer kerdêne. La rayêk moralê DAÎŞî xeripîya bi. Hînî cergî nêeşkayî xo ver bidê û remayî.

Yeno vatene ke Kobanê de 5 hezar cergê DAÎŞî kişîyayê. Nê cergê tewr marîfetînî bîyî. Înan pê nê cergan şaristanêko bîn qetî girewtêne. Kobanê de 485 kadroyê ma şehîd bîyî. Nînan ra tay kesî fermandar bîyî. Fermandarê Amed, Garzan û Erziromî bîyî. No seba ma bedelêko giran bi. Reyna xeylêk şerwanê YPGyî zî şehîd bîyî. Pê bedelanê pîlan Kobanê ameye azadkerdene. Ez pêro şehîdanê Kobanê û Rojawanî yad kena. Înan seba pêro merdimîye ganê xo feda kerd. Ê milîtanê fedayî yê Apogîrî bîyî. Ma gazî û birîndaran ra ber pêro hêzê xo Kobanê ra apey antî. Çunke serkewtişan cara YPG bihêz kerdbî. Înan tecrube girewt û hêzanê mîyanneteweyîyan reyde têkilîyê înan zî aver şîyî. Hînî ê hewceyê ma nêbîyî.''

Siba: DAÎŞ senî tasfîye beno?