Endamê Komîteya Rayberdişî ya PKKyî Murat Karayilanî û Fermandarê Qerargehê Merkezî yê Pawitişê Şarî Murat Karayilanî cewab da persanê Yenî Ozgur Politika.

Qiseykerdişê Karayilanî ra beşo çarin bi kilmî wina yo:

''Embaz Şehîd Gelhat Gabar waştişê xo ser pê komêka embazan hetê ma ra erşawîya Kobanê. O çax Kobanê ver bi merkezê Kobanê ameyêne. Ma embazan rê vat ke 'Eke şima hêrişanê DAÎŞî vindarnê ê kewenê, ma rê îmkanê hêrişî virazîyeno.' La DAÎŞ her şewdirî aver şîyêne. Mîsal binê fermandarîya embaze Destîna de komêka 8 embazan bînayêka 5-6 qatine pawitêne. DAÎŞî dima bîna teqnaye û embazê ma uca de şehîd bîyî. La embazê bînî şîyî serê enqazî û a bîna pawite. Embazan nêverda ke DAÎŞ a bîna bivisno destî. Ê cepheyî zî hêrişî ameyî vindarnayene û hêrişê ma dest pêkerdî.  Embaz Gelhat xora warê çalakîyanê hêrişî de wayîrê tecrubeyan bi. Ey mewzîyê DAÎŞî fam kerdî, keye bi keye aver şi û hêrişê hetê ma dayî destpêkerdene. Embaz Gelhatî vindarnayîşê DAÎŞî rê rayberîye kerde.

O çax Serekê Amerîka Obama zî tede lîderanê welatanê bînan zî Kobanê teqîb kerdêne. Obamayî Erdoganî rê telefon kerd û waşt ke paştî bêra dayene YPG. La Erdoganî tira vato Kobanê de PKK şer keno û PKK DAÎŞî ra hîna bitehluke yo. O çax Erdoganî waştêne wa pêro gerîlayî şorê Kobanê de şehîd bibê. Coka verdayêne embazî sînorî ra derbazê Kobanê bibê la verê paştdayîşêkê mîyanneteweyî zî girewtêne. La reyna zî Obamayî bire daya ke paştî bido ma. Bi nê hawayî rayberîya Amerîka de 16ê teşrîna verêne de Koalîsyono Mîyanneteweyî ronîya.

Koalîsyonî verî Silêmanî de YNKyî reyde têkilîye naye ro, embazê YNKgîrî zî fermandaranê YPGyî de qisey kerd. Fermandaranê YPGyî waşt ke tay cayê teberê cepheyan hewayî ra bêrê pirodayene. Bi nê hawayî hêrişê hewayî dest pêkerdî. Yanî Koalîsyonî raşta raşte mudaxeleyê şerî nêkerd. Kobanê de şero esas singe bi singe, keye bi keye pê sîstemê pêkewtişî ameyêne kerdene. Şerwananê YPGyî nameyê tay cayan dayêne teyarayan, înan zî dayêne piro. Dima ke Kobanê ame azadkerdene leşkerê pisporî yê Amerîka ameyî û înan koordînasyonê hewayî kerd. La xoverdayîşê Kobanê xoverdayîşêko azad bi. Koalîsyonê Mîyanneteweyî raşta raşte tesîrê nê xoverdayîşî nêkerd.

Kobanê de mabênê DAÎŞ û PKKyî de şerê îradeyî ame kerdene. Netîceya nê şerî de DAÎŞ vera PKKyî bin kewt. Xoverdayîşê Kobanê de tewirê qerardar û fedayî yê PKKyî desêk naro û DAÎŞ tarûmar kerd. Kobanê de asta îradeyî ya YPG, YPJ, HPG, YJA-Starî zaf girîng bîye.Embazanê ma Kobanê vera vera tankan çekê ferdîyî şuxilnayî. No îrade dima derbazê pozîsyonê hêrişî bi, Kobanê azad kerd û oyo ke DAÎŞ vist bin no îradeyo Apogîr bi.

Bi taybetî fermandaranê YPGyî şer îdare kerdêne. Ge ge ez gêrayêne embazan û rewşa înan persayêne. Înan zî îzeh kerdêne ke DAÎŞ ameyo heta kamca, cebilxaneyî gereka kamca ra bigêrayîyayê, tedbîrê înan senîn ê ûsn. Ma zî tecrube û fikrê xo înan de pare kedêne. Wextêkî ra pey Kobanê de şer vurîya şerê fedayîyan. Xora DAÎŞî qetî xo apey nêantêne. O çax MÎTî pêvînayîşê min ê bi YPGyî qeyd kerdê û mojnayê Amerîka, MÎTî vato 'HPG no şer îdare keno, Karayilan bi xo îdare keno.' Fermandarîya YPGyî ra embazêkî no çi telefon de mi rê vat. O çax o şîyêne dewa Koralî. Mi waşt ke dewe de o mi rê telefon bikero. Ey mi rê telefon kerd, mi hoporlerî ra venga şarî da, şarî reyde qisey kerd. Mi dima ê embazî rê vat: 'Şima reyde têkilîyê min ê merdimîye û torrê komelkî estê. Coka ez tecrubeyanê xo şima de pare kena, şima rê paştî dana. Wa ney zî qeyd bikerê.' Axir no xîretê MÎTî bênetîce mend. Xûlasa meseleya Kobanê bîye meseleya neteweyîye. Xora seke şima zî zanenê na çarçewe d epêşmergeyî zî şîyê Kobanê.''

Siba: Ameyîşê pêşmergeyan ê Kobanê