Endamê Komîteya Rayberdişî ya PKKyî Murat Karayilanî û Fermandarê Qerargehê Merkezî yê Pawitişê Şarî Murat Karayilanî cewab da persanê Yenî Ozgur Politika.

Qiseykerdişê Karayilanî ra beşo hîrêyîn bi kilmî wina yo:

''Kobanê seke binê ablûqa de bîye, hetêk de dewleta tirke hetêkê bînî de zî DAÎŞ estbi. Yanî seke mîyanê dengizê terorî de bîye. Qasê yew hezar şerwananê YPGyî Kobanê pawitêne la destê înan de çekê giranî çin bîyî. DAÎŞî pê tankanê Amerîka û çekanê giranan ê ke dest nabî ser 15ê êlula 2014î de hêrişê Kobanê kerd. Înan hêrişê Cizîre nêkerd mesela, çunke YPG uca de xurt bi. Hetê bînî ra ma destpêkê tebaxe de waştişê YPGyî ser tay alayî şawitbî Kobanê. Xora DAÎŞî temmuze de hêrişê Kobanê kerdbî û 1-2 hewte uca de mendbi. 

Efrîn zî binê ablûqa de bi. Ma binê fermandarîya embaz Masîroyî de tay hêzî şawitbî Efrînî. Nê embazî dima mîyan ra derbazê Kobanê bibî. 15ê êlule destpêkerdişê hêrişan ra dima DAÎŞ hîrê baskan ra aver şi la YPGyî xo ver dayêne. Hêzê DAÎŞî xurt bîyî, bi nê hawayî nêzdîyê merkezê Kobanê bi. Ma reyna waştişê YPGyî ser o takwîye şawite Kobanê. La nê takwîyeyî zî nêeşkayî DAÎŞ vindarnê. 

O çax Rayber Apoyî veng da ke qetî Kobanê wa bêra pawitene, ciwanê Vakurî wa tewrê seferberîye bibê. Vengdayîşê Rayberîye ra dima vakurijan sînor de nobete kerde û ciwanî tewrê YPGyî bîyî. Rayberîye prosesê Kobanê vurna. 

O çax Amerîka vatêne 'Ma hînî nêeşkenê Kobanê rê çîyêk bikerê.' Erdoganî zî wina îma kerd ke Kobanê do bin bikewa. O çax ma zî Fermandarîya Kobanê ya YPGyî de têkilîye viraşte. Embazî zî bêhêvî bîyî. DAÎŞ ver bi merkezî ameyêne, şarî koç kerdêne. O çax ma kombîyayîşê Konseya Fermandarîye ya HPGyî kerdêne. Ma babeta Kobanê ercnaye. Ma tay ercnayîşî kerdî.''Di îxtîmalî estbîyî: Ya sey her kesî do binkewtişê Kobanê biameyêne qebulkerdene yan zî mudaxeleyê do biamêyene kerdene û verê binkewtişî biameyêne girewtene. Her kesî netîceya xirabe pawitêne la ma verê binkewtişî girewt.'' Bedelê ney zî giran bîyî. La ma rê binkewtişê Kobanê zî zor bi. Axir ma kombîyayîş de vengdayîşê seferberîye yê Rayberîye ser vindertî û bire daye ke 'Kobanê ganî mekewa, sey hêzanê PKK û HPGyî ganî ma mudaxele bikerê. Verî ma 400 şerwanan bierşawê.' 

1ê teşrîna verêne de ma na bire daye, Hemserekîya KCKyî bire qebul kerde. Xora ê prosesî de Hemserekîya KCKyî, Sekreteryaya Pêroyîye ya PKKyî û Koordînasyonê Têgêrayîşê Cinîyan û dezgehanê ma yê bînan înîsîyatîf da ma. Bi nê hawayî ma bi lezî têgêrayêne. Bi nê hawayî wexto ke Kobanê bin kewtêne, her kesî netîceya xirabe pawitêne  ma verê binkewtişî girewt.

Fermandarîya Pêroyîye ya YPGyî zî waştêne Kobanê wa mekewa. Ma takwîyeyê xo kerdî, qismê fermandarîye de tay vurnayîşî kerdî. Ma mîsal embaz Çekdar Amed sey fermandar şawit, nê embazan tay çîyî vurnayî. Bi nê hawayî ma mudaxeleyê Kobanê kerd û Vakurî ra ver bi Cizîre hêzî herikîyayî. Ma çekî zî dîyî, dayî la vera cebilxaneyê ma qedîyayêne.

Rayêke (3 yan zî 4ê teşrîna verêne de) ma eşnawit ke takwîyeya ma resaya Murşîtpinar. Ma YPGyî rê vat ke yakwîye do şan biresa. La YPGyî vat heta şanî beno ke Kobanê bin bikewa. O çax şarê Vakurî zî sînor de nobete girewtêne. Ma embazan rê vat ganî ê şanî ra verî biresê Kobanê. Embazanê ma şar vist dewre. Şarî sînor de alozîye vete. 63 embazê ma pê kincanê sivîlan mîyanê şarî ra resayî Kobanê. Kobanê de depoyê çekanê zêdeyan estbi 63 embazan cade uca ra çeke girewte û mewzîyî kerdî zixmêr. Embazan Botan, Amed, Garzan û heta Erziromî ra xo resna Kobanê. 

Dewleta tirke waştêne Kobanê seba gerîlayan bikera warê mergî. Coka verda ke gerîlayî şorê Kobanê. Kobanê de her roje 13-14 gerîlayî şehîd bîyêne. Dewleta tirke wina plan kerdêne ke wa pêro gerîlayî şêrê Kobanê ke DAÎŞ înan bikişo. Ma nîyetê înan fam kerdbi la ma xoverdayîşê xo rê dewam kerd. Ma verê xo dabi serkewtişî. Ma takwîyeya bi 400 kesan ra dima pêser takwîyeyî kerdî û Kobanê de xoverdayîşo pîl dest pêkerd... Ma vat Kobanê do biba Stalingard, destpêkê qedîyayîşê DAÎŞî û eynî wina bi. 

Şarê ma yê Vakurê Kurdîstanî prosesê 6-7-8ê teşrîna verêne de yew hewte bêmabên xo ver da, seba ke cergî derbazê Kobanê nêbê nobete girewte. Xoverdayîşê Kobanê vurîya bi xoverdayîşêko neteweyî û komelkî. Nê tewirê şarê Vakurî zaf tesîrê xoverdayoxanê Kobanê kerd. Şarê ma mojna ke ê do qetî binkewtişê Kobanê qebul nêkero. Dewlete zî o çax seke Cizîre ra xo apey girewt. Amed, Qoser ûsn de dewlete hêriş kerd la Cizîre, Nisêbîn ûsn de xo apey ant. Bi nê hawayî kuçeyî bîyî ê şarê ma. 

Şarê ma vera hêrişanê DAÎŞî û vera vateyê 'Kobanê ha bin kewena' ya Erdoganî tewirê xo mojna. Vateyê Erdoganî kerd ke şar vejîyo teber, merdimî tehrîq kerdî. Ma zî o çax gerîlayê HPGyî şawitêne Kobanê. Vakurê Kurdîstanî bi hawayêkê topyekûnî vera wehşetê DAÎŞî asta tewr berze de wayîrê Rojawanî vejîya.

DAÎŞ aver şîyêne, kewtbî şaristanî. 250 metre mendbi ke ê biresê berê sînorî yê Murşîdpinarî. Eke DAÎŞî uca bivistêne destî Kobanê do bin bikewtêne. 100 merdimê ma yê welatperwerî hetê hêzanê ma de bîyî û seba ke hêvîya înan qedîyabî şîyêne Vakurî. Yanî xeylêk kesan de teredut estbi la ma pê bawer kerdêne ke Gulan, Arîn Mîrkan, Hêbûn, Cûdî û Cemîlê ke Amed, Botanî ra şîbî Kobanê do ser bikewê û rayîr medê dişmenî.''

Siba: Koalîsyono Mîyanneteweyî senî tewrê şerî bi?