Endamê Komîteya Rayberdişî ya PKKyî Murat Karayilanî û Fermandarê Qerargehê Merkezî yê Pawitişê Şarî Murat Karayilanî cewab da persanê Yenî Ozgur Politika.

Qiseykerdişê Karayilanî ra beşo diyîn bi kilmî wina yo:

''Rojanê verênan ê mudaxeleyî de Amerîka pê helîkopteran çend hêzê xo  Koyê Şingalî de ardî war. Înan embaz Egîdî rê vat ê dîrek PKK yê yan îndîrekt PKK yê. Embaz Egîdî zî vat ê bi xo hêzê PKKyî HPG yê. O çax Amerîka seba ke PKK de têkilîye mekera hînî nêameye.

O çax Mesûd û Mesrûr Barzanîyî pê rayîrê kuryeyêkî pers kerd ke raşta zî Koyê Şingalî de hêzê ma estê yan nê. Dima ke ma vat estê înan waşt ke tay hêzanê xo zî bişawê Koyê Şingalî. Ma zî qebul kerd. Xora ma nêvatêne ke îlahîm ma têna mudaxeleyê DAÎŞî bikerê. Bi nê hawayî hêzê PDKyî ameyî Rojawan û 1-2 rojî Cezaa de mendî. Ê hêzî hêzê fermandarê Aşitî bîyî ke no camêrd nika vera têgêrayîşê ma eşkerayîyanê nankoran keno. Axir ma hêzê PDKyî resnayî Koyê Şingalî. O çax şarê Şingalî vera pêşmergeyan nêrazîbîyayîşê xo mojna. Mudaxeleyê embaz Egîdî ra nêbîyêne uca de înan do hêrişê embaz Egîdî bikerdêne. La PDKyî dima bi hawayêkê neresmîyî vat ke PKKyî şarî rê tesîr kerdo. No raşt nîyo.

DAÎŞî o çax ver bi Kerkûkî dest pê têgêrayîşan kerd. Ma pê otobusan embazî şawitî Kerkûkî. Şêxan û Dihok de xeylêk merdimî ameyî cakerdene. Ma seba ke DAÎŞ hêrişê ci mekero tay embazî şawitî Laleşî zî, ma yew alaye şawite Dihokî. Ma seba pawitişê şarê Başûrî 4 alayî wezîfedar kerdî.  Nê mudaxeleyanê ma ra dima pêşmergeyî zî ameyî xo ser. Pêşmergeyan verî 2-3 reyî xo apey antbî la dima ke ma ameyî ê zî agêrayî. DAÎŞî seba ke Mexmûrî bivisno destî hêrişê pîlî kerdî. Heta embaze Denîze Firat uca de şehîd bîye. La ma xo ver da û DAÎŞ zî nêeşka aver şoro. Bi nê hawayî xoverdayîşê Mexmûrî bi berê pawitişê Hewlêrî.

Netîceya xoverdayîşê ma yê vera DAÎŞî de her kesî cesaret girewt. Seba ke YPG û HPGyî vera DAÎŞî xo apey nêgirewt tesîrêko winasên virazîya. Rayberîya Amerîka de Koalîsyono Mîyanneteweyî ronîya û hêrişê hewayî dest pêkerdî. DAÎŞî narey seba qesasê planê Kobanê viraşt.

Dewleta tirke verî PYD û YPGyî de têkilîye naye ro. Xora Tirkîya seba ke nê hêzî tewrê OSOyî bibê û vera rejîmê Sûrîye şer bikerê nê çîyî kerdî. Hetê bînî ra Tirkîya 2013 de vera YPGyî pê destê OSOyî hêrişêk da destpêkerdene la OSO bin kewt. Stratejîya esase ya Tirkîya na ya ke kurdî Sûrîye de wayîrê heqanê xo mebê û dîzaynê neweyî de ca megêrê. Tirkîya seba ney xîretêko pîl da la ser nêkewte. 2015 de Tirkîya na bi temamî kerde stratejîya xo.

Raşta zî Rayber Apoyî bi giranî tesîrê şarê Rojawanî kerd û YPG, PYD ûsn pê tesîrê xeta Rayberîye awan bîyî. La embazê ke YPG naro ma ra cîya bîyî û şîyî Rojawan. Nê embazan pê xîretê xo YPG rêxistin kerd, awan kerd. YPGyî wextê ronayîşî de ma ra û Mesûd Barzanîyî ra çekî waştî. Ma goreyê xo çekî dayî înan la ez vana qey Barzanîyî çeke nêdîya. Têkilîya ma ya bi YPGyî têkilîyêka dostane ya. Xora YPG sey ma tay rêxistinanê bînan ê kurdan de zî têkilîye virazeno. Dewleta tirke pê hesîyaya ke YPG do nêkewo binê fermanê ci. O çax hînî dewlete nameyê ma û YPG ardî têkişt.  

Paradîgmaya Rayber Apoyî têna Vakurî rê nê pêro Kurdîstanî rê tesîr kerd. Ewro Iraq, Pakîstan, Şîlî û Ewropa de zî pê tesîrê na îdeolojî tay partî û rêxistinî ronîyenê. Ronayîşê PYD û YPGyî zî na çarçewe de bi. Raşta zî mabênê ma û înan de yew yewîya îdeolojîke esta, paştdayîş esto. Başûr de zî partî û rêxistinê ke nêzdîyê îdeolojîya ma yê estê. Senî ke ma înan sey PKKgîr nêhesibnenê ma PYD û YPGyî zî wina nêhesibnenê. Dewleta tirke seba ke destkewteyanê şarê ma yê Rojawanî bivisna destî wazena PYD û YPGyî dekera mîyanê lîsteya terorî.

Ma nêvanê YPG û PYDyî reyde yew têkilîya ma çin a. Ma vanê yew têkilîya ma nînan de esta la na têkilîye organîk nîya. Ê cîya yê, ma cîya yê. Îdareyê ma cîya yê. Xora mabênê ma de yew paştdayîş esto çunke cara ma yewîya çepgîran pawenê. Paradîgmaya Rayberîya ma zî parafîgmaya pêro şaran a. Neteweya Demokratîke yena manaya yewîya pêro neteweyanê demokratîkan. La raşt nîyo ke merdim vajo nê pêro rêxistin û partîyî pabesteyê PKKyî yê.''

Siba: Kobanê rê mudaxeleyê HPGyî