Komîteya Rayberdişî ya PKKyî bi wesîleya serrgêra 9. ya Qirkerdişê Parisî keyepelê xo yê înternetî ser o eşkerayîyêke daye. Eşkerayîye wina ya:

''9 serrî verî Paris de şorişgêra pîle Sakîne Cansiz (Sara), embaze Rojbîne (Fîdane Dogan) û Ronahî (Leyla Şaylemez) ameyî qetilkerdene. Ma embazanê xo yê cinîyan ê şorişgêran bi rêz û minetî yad kenê, sozê xo dibare kenê ke xeta azadîya cinîyan de Kurdîstanê Azadî awan bikerê ke hesreta înan bîye.

No qirkerdiş hetê dewleta tirke ya kolonyalîste ra ame kerdene. Kiştox Omer Guney endamêkê MÎTî yo. Oyo ke fermanê nê qirkerdişî dayo hukmatê dewleta tirke yo. Bê fermanê hukmatê tirkî mumkîn nîyo ke MÎT nê qirkerdişî bikero. Xora nameyê 22 îdarekaranê PKKyî yê ke 'ganî biameyêne kiştene' çend mengî verî ameybî eşkerakerdene.

Embaze Sara seba ke ronayoxanê PKKyî û têgêrayîşê azadîya cinîyan ra yew bîye ameye hedefkerdene. Embaze Sara bi xoverdayîşê xo yê zîndanan zerrîya şarî de bîye wayîra cayêkê pîlî coka raşta nê hêrişî ameye. Seba dewleta tirke, Rayber Apo û PKK dişmenê tewr pîlî yê coka a ronayoxanê PKKyî kena hedef. Qirkerdişê embaze Sara vera têkoşînê kurdan qesas bi. Qirkerdişê nê cinîyan asta dişmenîya dewleta tirke mojneno. Seba ke ê wazenê estbîyayîşê kurdan werte ra wedarnê, êyê ke wayîrê estbîyayîşê kurdan vejîyenê sey dişmenê tewr pîlî vînenê.

Dewleta tirke zaf rîskî girewtî û bi nê hawayî embaze Sara û embazê ci qetil kerdî. No zî pîlîya têkoşînê embaze Sara vejeno verê çiman. Embaze Sara sey hêrişê şarê Kurdîstanî û şarê Dêrsimî tewra Apogîran bîye û a bîye ronayoxanê PKKyî ra yew. No tewrbîyayîşê ci nîşaneya çêrî ya. Sey cinîyêke tewra têkoşînê pîlî bîye û mesuldarîyêka winasêne girewte xo milî. No zî mojneno ke embaze Sara wayîra kesayetêkê senîn a.

No kesayetê embaze Sara xoverdayîşê Zîndanê Amedî de eşkera bi. Embaze Sara bi xoverdayîşê xo seba embazan ê cinîyan bîye çimeyê cesaretî, çimeyê moralî. Aye vera teda û îşkenceyê giranî, îrade û tewirê xo ra apey gamêke nêeşte. Qet yew teda û îşkence nêeşka tewirê aye çin bikero. Teda û zulm bi sebeb ke tewirê aye  bêro mojnayene. 

Embaze Sara seba ke welat û şarê xo ra zaf hes kerdêne tewra têkoşînî bîye, aye pê nê heskerdişî heta hela peyêne ya cuya xo têkoşînê azadîye ard ca. Aye hîsê cinîyanê ke serdestîya camêrdan ra 5 hezar serrî anto, vistî mîyanê zerrîya xo, girewtî milê xo û seba serkewtişî her hela cuye de têkoşîn kerd. Embaze Sara bi kelecanê pîlî yê têkoşînî azadîya cinîyan tim bi coş bîye. Coş û waştişê ci yê têkoşînî sey volkanêkî tim rîyê dişmenî de teqîya. Cuya ci pê heskerdişê embazan û dormeyê ci, pê vilakerdişê enerjî derbaz bîye. Embazanê ke wextêkê kilmî embaze Sara dîbî tira zaf hes kerdêne û ci rê hûrmet mojnayêne. Embaze Sara do têkoşînê azadîya şarî û cinîyan de tim bêra yadkerdene. Sey kesêka sembole yê nê têkoşînî do cayê xo mîyanê bêmergan de bigêra.

Rojbîne embazêka zerrîpake bîye ke rojawanê Firatî ra neçare mendbî ke koçê Ewropa bikera. Seba ke Ewropa de biba vengê şarê kurdî karê dîplomasî kerdêne. Daşinasnayîşê têkoşînê azadîye yê şarê kurdî û averberdişê azadkerdişê Rayber Apoyî de rolê ci estbi. Vengîya ke peyê ci ra menda hema zî dewam kena.

Embaze Ronahî embazêka ma ya ciwane bîye ke sey Alî Çîçekî dej, hesret û hêrsê şarê kurdî zerrîya xo de kiriştêne. Bi mesuldarîya caardişê estbîyayîşê şarê kurdî û azadîye aye tim waştêne ke tewr vernîya têkoşînî de biba. Seba ke biba layîqa estareyê sûrî yê şarê kurdî Alî Çîçekî kewte mîyanê têkoşînêkê pîlî.

Rixmo ke embaze Sara, Fîdane û Ronahî merkezê Parisî de ameyî qetilkerdene sîstemê edaletî yê Fransa dewleta tirke û êyê ke fermanê qirkerdişî dayo nêvetî verê edaletî. Seba menfaatanê ekonomîk û sîyasîyan Fransa edalet da kiştêke. Heta ke Fransa mesuldaranê raştîyan ê nê qirkerdişî nêveja verê edaletî do tim sey dewletêka qelse bêra dîyene. Dezgehê fermî yê Fransa beno ke seba menfaatanê xo edalet danê kiştêke. Ma pawenê ke şar û hêzê demokrasî yê Fransa na dewa de tewirê xo bimojnê û bikerê ke mesuldarî bêrê muhakemekerdene. Dewaya Qirkerdişê Parisî têna dewaya demokratanê Fransa û kurdan nê dewaya cinîyanê pêro dinya ya. Ma pê bawer ê ke cinîyê dinya do wayîrê na dewa vejîyê û seba muhakemkerdişê sûcdaran têkoşîn bikerê.

Şarê kurdî do peyê mesuldar û kiştoxan meverdo, pê azadkerdişê Kurdîstanî û demokratîkkerdişê Tirkîya do cewabê tewr xurtî bido nê qirkerdişî. Bêguman muhakemekerdişê kiştoxan do seba şar û cinîyan ê kurdan bibo wezîfeyo sereke.

Ma embazanê ke 9ê çeleyî de Paris de şehîd bîyî bi rêzdarî yad kenê û sozê xo dibare kenê ke pê pîlkerdişê têkoşînî do wayîra hesreta înan vejîyê.

Ma embazan Rûbare, Xelîl û Merat zî bi rêzdarî yad kenê ke 6ê çeleyê 2017î de hêrişê hewayî yê dewleta tirke de şehîd bîyî. Alaya înan a têkoşînî ewro zî her warê Kurdîstanî de berz bena.

Ma xoverdayoxanê menga çeleyî Sêvê Demîr, Pakîze Nayir û Fatma Uyar bi minet û rêzdarî yad kenê, sozê xo dibare kenê ke têkoşînê azadîye de ma do wayîrê xoverdayîş û çêrîya înan a pîle vejîyê û Kurdîstanê azadî, Tirkîya û Rojhelatê Mîyanênî yê demokratîkî awan bikerê ke hesreta şehîdanê ma ya.''