Komîteya Merkezî ya PKKyî bi wesîleya serrgêra 43. ya ronayîşê PKKyî eşkerayîyêka nuştekîye daye. Eşkerayîye wina ya:

''Partîya ma PKK 26-27ê teşrîna peyêne ya 1978î de dewa Fîsî ya Licê de kongreya xo ya fermîye kerde û ma serrgêra 43. ya ronayîşê PKKyî de yê. Têgêrayîş û şar kewenê serra têkoşînê 44 serrî yê bi rayberîya PKKyî. Serrgêra 43. ya ronayîşê PKKyî, Roşanê Partîye û Gandarbîyayîşî sere de Rayber Apoyî rê, pêro şarê ma, embazan û hemrayan rê fîraz ba. Şexsê embaz Hakî Karerî de ke şehîdo verên ê partî yo, ma pêro şehîdan bi rêz û hûrmetî yad kenê. Serra 44. ya PKKyî de ma pêro têkoşîneran rê serkewtiş wazenê.

Seke zanîyeno bingeyê Rayberîye û partîya ma PKKyî Newroza 1973î de ameya eştene. PKk partîyêka Newroze ya. Rayraşîyayîşê Azadîya Pîle Newroze de do bikewo serra 50. Ma nika ra serra 50. fîraz kenê. Sere de cinî û ciwanî ma venga pêro şarê xo û dostanê xo yê şorişgêr û demokratîkan danê ke her wextî ra zêdêr bi îdîaya pîle serrgêra 43. ya ronayîşê partîye û serrgêra 50. ya bingeyî fam bikerê û bi coşî fîraz bikerê.

Tîya de ganî no pers bêro perskerdene: Raştîya Rayber Apoyî û têkoşînê PKKyî nêbîyayêne rewşa kurdan û Kurdîstanî do senî bibîyêne? Cewabê ney no yo: Serê dinya de nameyê kurd û Kurdîstanî ser o do çîyêk nêmendêne. Pê têkoşînê 50 serrî Rayber Apo û PKKyî verê qirkerdişî girewt. Estbîyayîşê şarê kurdî û azadîya ci garantî kerdî. Dişmenanê PKK û şarê kurdî ra ber hes kes na raştîye qebul keno.

Rayber Apo û PKKyî kurdî û komelê kurdan bingeyê azadîye ser o newe ra afernayî. Şarê kurdî no kerd îrade û hêz, Şorişê Gandarbîyayîşê Neteweyî awan kerd û qewimîyayîşê neteweya demokratîke dayî destpêkerdene. Derbê giranî dayî serdestan ro. Seba ke Başûr bibo wayîrê statuyî rolêko bitesîr ard ca, Şorişê Azadîye ya Rojawanî kerd hêvî, Şingal de verê DAÎŞî girewt, Tirkîya û Rojhelatê Mîyanênî de roştîyêke viste ta û verê şorişê demokratîkî akerd.

Bêguman Rayber Apo û PKKyî warê azadîya cinîyan de averşîyayîşo tewr pîl ard ca, Şorişê Azadîya Cinîyan kerd bingeyê şorişê komelkî. Şorişê Azadîya Cinîyan a ke rayberîya PAJK û çêrîya YJA-Starî de yena kerdene, beno garantîya azadîya kurdan, sîstemê serdestîya camêrdan parçe keno. Seserra 21. do biba seserra cinîyan, cuya azad, demokratîke û têdûşte. Tesîrê nê qewimîyayîşan do ameyox de zêdêr xo bimojnê.

PKKyî semedê nê qewimîyayîşanê tarîxîyan xeta fedayîye de şer kerd. Têkoşînê her serra bi zehmetî derbaz bi, her roje 43 serran de destanê çêrîye nusîyayî, bi des hezaran şehîdî ameyî dayene. Pûçkerdişê zehmetîyan bi terzo bingeyî yê milîtanîye. Kêna û lajanê şarê kurdî xeta fedayîde têkoşîn kerd û nê qewimîyayîşî vetî werte. Tesîrê nê qewimîyayîşan do ameyox de zêdêr xo bimojnê.

Her serra têkoşînê PKKyî hetbetîn bîye. Faşîzmê AKP-MHPyî pê destekê PDK û Amerîka vera gerîlayan û PKKyî hêrişê tasfîye plan kerdî. Nê hêrişan de her metodî şuxilîyayî. Vera nê hêrişan Hemleya Wextê Azadîye ser o xoverdayîş dîya destpêkerdene. Hêzanê ma yê gerîlayan Garê, Metîna, Zap û Avaşîn de, Herêmanê Pawitişî yê Medya de, Vakurê Kurdîstanî de xoverdayîşo fedayî kerd û rolêko serkêş ard ca. Faşîzmê AKP-MHPyî çekê kîmyewî şuxilnayî la pê îradeyê gerîlayan nêeşka. Şarê ma pê çalakîyan zere û teberê welatî de paştî daye gerîlayan û hemleya ma bi xurtî daye dewamkerdene. Tepişteyî tim mîyanê xoverdayîşî de bîyî. Nê esasî ser o ma têkoşînê serra 43. ya şarê xo selam kenê û serkewtişê înan fîraz kenê.

Serra 44. ya PKKyî netîceyî verê çiman de yê. Planê Çokdayîşî yê AKP-MHp bin kewt, faşîzmê AKP-MHPyî eşkera bi. Gerîlayî Serkewtişê Garê ra dima Serkewtişê Metîna, Zap û Avaşînî rê dewam kenê. Hêzê faşîstî yê AKP-MHPyî neçare manenê ke cayanê îşxalkerdeyan ra xo apey biancê. Serra 43. de rejîmê AKP-MHPyî ame şiknayene û serra 44. de zî rejîmê înan do bêro rijnayene.

Nika rojdemo esas rijnayîşê AKP-MHPyî reyde no yo ke îdareyo newe yê Tirkîya do senî bibo. Yeno dîyene ke hem Amerîka û hêzê teberî hem zî CHP û hêzê zereyî cigêrayîş de yê. Ê gêrenê ke dişmena kurdan dewleta tirke ya îşxalkere senî payan ser de vindarnê. Ma eşkera vanê ke Tirkîya pê îdareyêkê taqlîdê AKP-MHPyî nêeşkena payan ser de vindera. Pê vateyanê sey 'helalîye waştişî' rejîmo faşîst-qirker nêeşkeno xo bixelisno. Êyê ke pê şerî faşîzmê AKP-MHPyî çin kenê, zanenê ke heqê nê dek û dolabaran ra bêrê.

Ma CHP zî tede partîyanê Tirkîya û hêzanê ke Tirkîya de têkilîye kenê rê bi eşkera vanê: Seba ke hişmendîya sîyasetê qirker-faşîstî yê Tirkîya birijîyo û meseleya kurdan çareser biba şima vanê se? Şaran rê 'helalîye waştişî' hewce nîyo; rijnayîşê rejîmî, azadîya Kurdîstanî û demokratîkbîyayîşê Tirkîya hewce yê. Ganî her kes nê esasî ser o tewirê xo zelal bikero. Hêzê sîyasetê demokratîkî ganî bibê alternatîfê faşîzmê AKP-MHPyî. Ma hêzanê hemkaran ê sey PDKyî rê zî vanê ke bes hemkarê nê sîyasetê faşîstî binê. Sere de Amerîka û Yewîya Ewropa, hêzê teberî zî ganî bizanê ke hûrmet bidê îradeyê azadî yê şarê kurdî û seba ke Tirkîya de hişmendî û sîyasetê faşîst-qirkerî payan ser de vindarnê tay kayan bikerê.

Bêguman ma sey têgêrayîş û şarî serra 44. ya PKKyî de têkoşînê xo yê azadî û demokrasî do geş bikerê û bidomînê. Serra 43. de ma faşîzmê AKP-MHPyî şikna, serra 44. de zî ma do birijnê. Ma do meverdê ke rejîmo faşîst-qirker pê dek û dolaban xo payan ser de vindarno. Seba ke sîstemê îşkenve û tecrîdê vera Rayberîye bişikîyo ma do her çi bikerê. Rayber Apoyî ra xeberêne nêna girewtene. Na rewşe de seba şiknayîşê tecrîdî ganî her wextî ra zêdêr têkoşîn bêro geşkerdene. Serra 44. ya partîye de ma do têkoşînê winasênî geş bikerê.

Elbet ma do nê pêroyînan pê hêzê xo şarê xo yê welatperwerî û ciwanan reyde bikerê. Ma dp têkoşînê winasênî, yewîya demokratîke ya neteweyîye ya kurdan geş bikerê, sere de şaranê Tirkîya hêzanê şorişgêr-demokratîkan reyde îtîfaq bikerê. Nê esasî ser o ma Rojanê Gandarbîyayîşî reyna fîraz kenê. Ma venga şarê xo û dostanê xo danê ke wa qewimîyayîşan hol fam bikerê û serra 44. ya têkoşînî bikerê serra serfîrazîye ya pîle.''