Komîteya Merkezê PKKyî ke kombîyayîşê xo yo serrane bi tewrbîyayîşê 27 endamanê xo kerd. Kombîyayîş de semedê pîlkerdişê Hemleya Wextê Azadîye yo ya ke azadîya fîzîkîye ya Rayberê Şarê Kurdî Abdullah Ocalanî hedef kena, ame vengdayene.

Komîteya Rayberdişê PKKyî badê kombîyayîşî eşkerayîyêke daye û nê pare kerdî: ''Seke yeno zanayene serra 2021î de şerê azadîye yo ke partîya ma kena resa tîtikê neweyî. Artêşa tirke menga sibate de vera Garê û menga nîsane de zî vera Metîna, Zap û Avaşînî hêrişê îşxalî da destpêkerdene. Nê hêrişî bi têkoşînê qehremakî yê gerîlayanê HPG û YJA Starî şikiyayî. Serkêşîya têkoşînê gerîlayanê ma de şar û dostanê ma bi têkoşînê xo yê tarîxî planê îmhakerdişî yê AKP-MHPyî yo ke bi paştdayîşê Amerîka û PKDyî ame kerdene pûç vet. Kombîyayîşê ma ke netîceyê tarîxîyî yê têkoşînê 2021î selam kerdî, xetayî û kêmayîye ke mîyanê têkoşînî de qewimîyayî girewtî dest. Na çarçewe de tewiro teng û bêplan ame rexnekerdene û stratejîya şerê şarê şorişgêrî û terzê xeta modernîte  ser o ame vindetene.''

Raştîya Rayberîye

Kombîyayîş de raştîya Rayberîye, têkoşînê Îmraliyî sey rojdemê taybetî gerîya dest. Seba ke raştîya Raberîye Rojhilatê MÎyanênî û heme dinya de zafêr bêro vilakerdene, sere de cinî ciwanî seba ke birese heme şaranê bindestan bale ameye antene wezîfeyanê bineyînan ser. Kombîyayîş de ame vatene ke şero esasî Îmrali de hetê Abdullah Ocalanî ra yeno kerdene ke ganî no her hetî ra raşt bêro famkerdene û serekwte bêro pratîkerdene. Kombîyayîş de bale ameye antene tecrîdê giranî yê Îmraliyî ser, tehdît û tehlukeyî ameyî ercnayene û semedê pîlkerdişê têkoşînê topyekunî ame vengdayene.

Xebatê îdeolojîkî

Kombîyayîş de bale ameye ser antene ke têkoşînê Azadîye yê Kurdîstanî û şerê dinya yê hîrêno ke yeno qewimîyayene zafê ci îdeolojîk o û ame vatene:'' Faşîzmê AKP-MHPyî hêrişê asîmîlasyon û qirkerdişî keno. Ganî her warî de têkoşîno îdeolojîk bêro xurtkerdene. Na çarçewe de ganî heme nuştox, roşnvîr, hunermend û edebîyatkarê kurdê welatperwerî mîyanê xo de xo zafêr rêxistine bikerê şorişê azadîye yê ma hetê kulturkî ra aver bêrê.''

Rewşa leşkerî û sîyasîye

Kombîyayîş de  rewşa leşkerî û sîyasîye her hetî ra gerîyaye deste û nê ameyî vatene: ''Şerê Dinya ê Hîrêyino ke merkezê ci Rojhilatê Mîyanên o dewam keno. Têkoşînê polîtîk û leşkerî yê nê şerî de terzê pawitişî do ser nêkewo, ganî her hetî ra aktîf bêro mendene û hamleyî bêrê kerdene. Semedê rijnayîşê sîtemê îqtîdar û dewlete ganî têkoşîno ke peyê ci de azadîye cinîyan û ekolojîya komelkîye esto bêro kerdene. Îqtîdarê AKP-MHPyî û Amerîka-PDK her çî de pêsere mekerê zî vera PKKyî tim pîya têgêrenê. Bitaybetî serranê peyênan de îtîfaqê mabênê PDKyî û AKP-MHPyî vera estbîyayîş û azadîye kurdan tehdîto tewr pîl o. Ganî vera nê şerê şorişgêrî bêro pîlkerdene û xeta îxanetî bêro teşhîrkerdene.

Vengdayîş

Faşîzmê AKP-MHPyî cehd keno ke estbîyayîş û azadîya kurdan tarîxî ra biestero. Semedê nê bi heme hêzê xo hêriş keno û heta ke bibo zî do hêriş bikero. Rijnayîşê nê faşîzmî têkoşîno tewr demokratîk û şorişgêr ê dinya yo. Ganî heme partîye sîyasîyî û hetê demokratîkî yê kurdan vera faşmîzê AKP-MHPyî yo ke dişmenê kurdan o, bibê yew. Reynra heme hetê dmeokratîk, çepgîr, şorişgêr têgêrayîşê cinîyan ê ciwanan ê Tirkîya zî têkoşînî pîlêr bikerê. Na çarçewe de sey îtîfaqê hîrêyinî wa têgêrayîşê demokrasîyî bêro rêxistinekerdene.Sere de îdareyê Iraq û Îranî ma veng danê heme hêzanê polîtîkî yê nê waran ke semedê çareserkerdişê demokratîkî yê meseleya kurdan ma pîya bigurîyê.''

Kombîyayîş de serkewtişê şaranê Rojawanî yê vera çeteyanê DAÎŞî ame fîrazkerdene. Reyna heme tewir û vindetişê wayîrvejîyayîşê Abdullah Ocalanî û PKKyî ameyî selamkerdene û ame vatene ke nê cehdkerdişî ganî bibê xurtêr. Kombîyayîş de planê xebat û têkoşînê dewrê neweyî ameyî kerdene û tewirê rêxistine û îdareyî goreyê nê planan newe bîyî.

Serra serkewtişî

Eşkerayîye bi nê vatişan qedîyaye: ''Têgêrayîşê ma semedê têkoşînî amade yo.Têkoşînê rijnayîşê faşîzmî, şiknayîşê tecrîdê Îmraliyî û azadkerdişê Kurdîstanî û demokratîkkerdişê Tirkîya do dahîna xurtêr ver bi serekwtişî şiro. Vera Komployê 15ê Sibate do têkoşîn bêro pîlkerdene û 8ê Adare û Newroze têkoşînê azadîye bireso tîtikê neweyî. Serra pancasine ya  Rayberîye û partîye de her roje do bibo sey Newroze û emser bibo serra tewr pîle ya serkewtişî.

Ma Endama Komîteya Newe ra Awankerdişê PKKyî û şehîda pîle ya Başûrê Kurdîstanî hemra Vîyane Soran serrgêra şehadetê ci ya 16. de yad kenê, a do tim têkoşînê azadîye yê ma de biciwîyo.''