Artêşa tirke ya îşxalkere 28ê kanûna 2011î de hêrişê dewa Roboskî ya Şirnexî kerd û qirkerdişêk kerd. Domanî zî tede 34 kurdî netîceya nê hêrişî de kişîyayî.

Gerîlaya YJA-Starî şehîde Zîlane Roboskî (Sanîye Encu) rojnuşteyê xo de wina qala 11ê kanûna 201î Qirkerdişê Roboskî kerdbî:

''Roboskî... Dewa ma warêko rind o. Pê nuştişî nêno ziwan ganî merdim tede bimano. Her çi ho verê çimanê mi de yo. Çemê taxan, şikefteyê heybetînî. Şarê ci zî pê kulturê xo ciwîyayêne. Pê ziwanê xo qisey kerdêne.

Şîyayîşê dibistane zaf zehmet bi, serra 7. de zor û zehmetîye dest pêkerd. Nê zor û zehmetîyî ameyêne sereyê domananê kurdan. Wijdan, persayîş, hesabpersayîş...Ma çira bi tirkî musenê, çira neçare yê ke bi tirkî qisey bikerê? Nê persî tim vîrê ma de bîyî. O çax mi fam kerd ke înan di alternatîfî ronabî verê ma de; ya ma do bimusê yan zî keyeyê xo de ronişê. Cuye bi kurdkî çinbîye. Ma erey no fam kerd.

Wexto ke ez resaya koyan mi cuye hîs kerd. Şewa 28ê kanûna 2011î de wexto ke dewa ma dîya bombayan ver, mi fam kerd ke seba kurdan cuye çin a, eke ma gerîla nêbê cuye ma rê heram a. Bîlal, Mehmet, Erhan, Savaş, Mahsûn, Husnu... Sey vizêrî pêro vîrê mi de yê. Kayê ke ma kay kerdêne, yarîyê ke ma kerdêne, şîyayîşê ma yê dibistane.

Heqê ma çinbi ke ma doman bibê, hema 10 serrîya xo de ma bîyî pîl.

Erhan Encu: Tek domanê keyeyê bi, bi hawayêkê qîmetînî û narînî pîl bibi. Seba ke debara keyeyê xo bikero bi saetan şîyayêne, bi saetan xebitîyayêne. Zerrîya xo ya qije de dinya kiriştêne. Eşiqê têkoşînî bi. Verî ke çîyê ke waştêne bikerê kewt torra cinawiran. Bi hedefê gonîrijnayoxan.

Mehmet Encu: Mehmet... Seba ey çita vaja kêm beno. Aşiqê kurdan û LKurdîstanî bi. Kincê neteweyî xo rê kerdêne, zaf rind bi kurdkî qisey kerdêne. Bi xoza, bi haywanan bilîyaye bi. Dinyaya xo ey bi xo awan kerdbî. Cuya ci pêro bi qerardarîya 'ez do rojêke tewra têkoşînî biba' derbaz bîye û seba vînayîşê embazan şîyêne û ameyêne koyan. Rojêka winasêne ya coşe de bi hedefê bombardumanê xayînî.

Bîlal: Zerrîya ci hende pîl bi ke kes tira ecîz nêbîyêne, her kesî tira her kerdêne. Serrêka qije de babîyê ci dinyaya xo bedilnabî. Coka barê wayîrvejîyayîşê keyeyî kewtbi milê ey ser. Ey domanîya xo de zî xeylêk karî kerdî.

Savaş: Sey nameyê xo bi. Hişmendîya ci zaf xorin bîye. Ey domanê taxe kom kerdêne, rêxistin kerdêne, qala ci kerdêne ke ganî seba çi ma şer bikerê. Dişmenî no hunerê ci yê rêxistinîye û şerkerdişî dîbî. Ey dewa xo ya rindeke de dinyaya xo bedilnaye.

Mahsûn: Bi kelecan û bi cuye dekerde bi. Zaf jîhat û çêr bi. Seke ey bi cuye yarî kerdêne. Hem zaf cidî bi hem zî zaf yarîyî kerdêne. Cuya xo de reya verêne merdimanê xo reyde kewt rayîr ke debara keyeyê xo bikero. No rayîr seba ci bi gor.

Husnu: Taybetmendîyanê camêrdan ra dûrî bi. Îqtîdar, zorbazîye, teda ra dûrî bi. Zewajê xo de zî wina bi. O wina nêzdîyê cinîya xo bibîyêne ke her kesî tira mîsal girewtêne. O zî peyê debara doman û keyeyê xo de bi.

Şewa 28ê kanûne de înan dinyaya xo bedilnaye. Dewlete xîret kerd ke no meşrû bikera.

Ez do seba şima şer bikera, seba ke qesasê şima bigêra vera artêşa dewleta tirke ya bêexlaqe  şer bikera.''