Îqtîdarê AKP-MHPyî xîret keno ke Wan û Colemêrg de eşîretperestîye aver bero.

Hemşaredarê Geverî Îrfan Sariyo ke herinda ci de qeyûm ame tayînkerdene derheqê babete de ANFyî rê qisey kerd.

Îrfan Sariyî ard ziwan ke wextê têkoşînê kurdan aver şi eşîretperestîye û dînperestîye sey çekêke qestî ra dest pê şuxilîyayîşî kerd. Sariyî vat: ''Birêxistinkerdişê ney gamêka newîye ya nê planî ya.  Sey weqif, cemat û tarîqatan nê komelan rê zî paştdayîşî fînansî yeno kerdene. Eşîretî hetê îqtîdaran ra seba prosesê zereyî şuxilîyenê. Bi kilmî ê wazenê nê eşîratan vera HDPyî sey alternatîfêkî mîyanê şarî de rêxistin bikerê.''

Hemserekê HDPyî yê Şemzînanî Îbrahîm Opengînî zî pare kerd ke AKP wazeno bi rayîrê eşîretan axatî, qebiletî ûsn gandar bikero û xo rê bingeyêkî amade bikero. Opengînî vat: ''AKP verî zî xîretê winasênî mojnabî. La no kay do ser mekewo, çunke kurdî wayîrê hişmendîya neteweyî yê. Bi çend komeleyan AKP nêeşkeno no şar çin bikero. Kesê ke sey serekeşîr şinasîyêne dekewtî weçînayîşî la şar ê nêweçînayî. Şarê kurdi nêkeweno dafika winasêne.''