Serekê Şaredarîya Dêrsimî yê Partîya Komunîste ya Tirkîya (TKP) Fatîh Mehmet Maçogluyî   vizêr dimayo ke mazbataya xo girewte şaredarîye zî dewr girewte.

Vero ke Maçoglu şaredarî dewr bigêro grûbêka paştîdayoxe ya ke mîyanê înan de parlamentera HDP’yî ya Stenbolî Dilşat Canbaze zî estbî verê şaredarîye de ameyî têhet.

Maçogluyo ke vere banê şaredarîye de eşkerayî daye her keso ke ê rê paştî daya rê spas kerd û vat sozê ke înan verê weçînitişî dabî do hemine bica bîyarê. Maçogluyî vat înan bi 68 mîlyon û 350 hezar TL bideyn şaredarîye dewr girewta û vat, “Ma do heme xebatanê ke hetê şaredarîye ra ameyê kerdene bi ekîpêka taybete ser o vinderê. Dima ra ma do ê xebatan hemine rayapêroyî dir pare bikerê û banê şaredarîye rê aliqnê. Ma do heme xebetanê qeyûmî yew bi yew biwekênê, ma do îtîrazanê xo bikerê. Deyno ke ma rê ameyo verdayene do bi ma pey ser game nêdo eştene. Ma do cayo ke hemserekê tepişteyî yê DBP’yijan ma rê verdayo ûca ra dewam bikerê.”