Dewa Roboskî ya qezaya Qilabanî ya Şirnexî de 28ê kanûna 2011î de rayîrê agêrayîşî yê sînorê Vakur û Başûrê Kurdîstanî de 17ê ci domanî 34 ciwanê kurdî pê teyarayanê şerî yê dewleta tirke ya îşxalkere ameyî qetilkerdene. Serrgêra 10. de qrubanê Qirkerdişê Roboskî serê goranê xo de ameyî yadkerdene.

Merasîmî ra verî keyeyê Roboskî pê fotografanê qurbanan ver bi goristanî rayîrî ra şîyî. Hemserekê Kongreya Komelê Demokratîkî (KCD) Berdan Ozturk, Hemsereka DBPyî Salîha Aydenîz, Vervatoxa HDPyî Ebru Gunay, Hemvervatoxê HDKyî Cengîz Çîçek, Serekê Yewîya Baroyanê Tirkîya (TBB) Erînç Sagkan, serekê baroyanê Kurdîstanî û bi seyan kesî beşdarê barnameyî bîyî.

Bernameyê yadkerdişî pê deqayêkê rêzgirewtişî dest pêkerd. Verî Serekê Baroyê Şirnexî Rojhat Dîlsîzî qisey kerd û vat: ''100 serrî yo no erd raştê qirkerdişan yeno. Heta ke kiştox û mesuldarî vejîyê werte û bêrê muhakemekerdene ma do têkoşînê xo rê dewam bikerê.''

Erînç Sagkanî vat: ''Rayîrê pêştişê birînan caardişê huqûq û edaletî ra derbaz beno. Seba ke hêsirê dadîyanê Roboskî vinderê ma do têkoşîn bikerê.''

Serekê Baroyê Amedî Nahît Erenî vat: ''Dewlete kiştoxan pawena. Heta ke edalet nêro Roboskî çew nêeşkeno qala edaletî bikero.''

Hemserekê KCDyî Berdan Ozturkî vat: ''Pêro dinya zanena ke kamî no qirkerdiş kerd. Êyê ke qala uzrwaştişî û helalîye kenê ganî verî hesabê Roboskî, Zîlane û Dêrsimî bidê. Birêz Ocalanî waştbi Komîsyonê Cigêrayîşê Heqîqatan bêro awankerdene. Dejê ma nêkêmîyeno. Heta ke ma hesabê nê qirkerdişan mepersê edalet nêno Tirkîya.''

Hemserekê HDPyî yê Îstanbulî Ferhat Encuyî vat: ''Ma hema zî şîn gênê, kincanê reşan danê xo rê. Têkoşînê ma têkoşînê edalet û raştîye yo. Ma hêvîdar ê ke her kes zêdêr wayîrê keyeyanê Roboskî vejîyo. Cayêk nêmend ke ma muracatê ci nêkerdo la heyf ke tira netîce nêvejîyaye. Heta ma hesabê nê qirkerdişî nêpersê têkoşînê ma nêqedîyeno.''