Endama Koordînasyonê KJKyî Rewşene Mêrdîn tewra bernameyê taybetî yê Stêrk TVyî bi û cewab da persan, rojdem ercna. Qiseykerdişê Rewşene Mêrdîn ra beşêk wina yo:

''Rayberê ma 23 serrî yo bi hawayêkê giranî yeno tecrîdkerdene. Rewşa Serekê ma ra dewleta tirke têna mesuldarî nîya. Senî ke esîrkerdişê Rayberê ma de rolê dewletanê Ewropa eso, tecrîdê ci de zî rolê dewletanê Ewropa esto. Bira Konseya Ewropa ya serê Rayberê ma erey bîye zî birêka girînge ya. Tecrîdê Îmraliyî tesîrê her hetê komelî keno. Paradîgmaya Rayber Apoyî eşkena pêro krîzan çareser bikera. Heta ke Rayber Apo azad nêbo zî nê krîzî do dewam bikerê. Têgêrayîşê cinîyan do têkoşînê vera tecrîdî rê dewam bikero.

Îqtîdarê AKPyî destpêkerdişî ra nata vera zîndanan teda keno. Îqtîdar pêro dizd, kiştox û tecwuzkeran zîndanî ra vejeno la pêro muxalîfan û kesanê ke fikrê xo anê ziwan dekenê zîndanî. Tepişteyê sîyasîyê ke zafê înan cezaya xo qedînaya, vera nêdîyenê. La îqtîdar nînan rê teslîmîye ferz keno.

Hêrişê vera Garîbe Gezer hetê dewlete ra qestî ra ameyo kerdene. Dewleta faşîste do hesabê ney bida. Garîbe bi rayîrê keyeyê xo îfade kerdbi ke ci rê tacîz, tecawuz û bêrûmetîye ameyê kerdene. Garîbe Gezer wayîra xoverdayîş û têkoşînêkê rûmetênî bîye. Seba ke aye sere wedarna hetê faşîzmî ra bi barbarî ameye qetilkerdene. Ganî şar, bi taybetî cinîyî wayîrê têkoşîn û xoverdayîşê Garîbe Gezer vejîyê. Ma tewirê dadîya Garîbe sey rûmetênî vînenê. Ganî her dadîya kurde wina têbigêra. Eke dadîyî bibê yew û vera faşîzmî tewrê xo bigêrê faşîzmê AKPyî do bin şêro.

Têgêrayîşê cinîyan do hesabê qirkerdişê Garîbe Gezer biperso.  Bi seyan cinîyê rayberî mîyanê çar dêsan de tepişte yê. Sûcê înan çin o. Seba ke azadîye waştêne tepişîyayê. Garîbe zî nînan ra yew bi. Mesuldarê qirkerdişê Garîbe Gezer wezîrê karanê zereyî yo û do hesabê ci bido. Sey têgêrayîşê cinîyan ê azadan ma do heta peynî wayîrê têkoşînê Garîbe Gezer vejîyê. Ma venga pêro cinîyan danê ke vera nê qirkerdişî wayîrê tewirî bibê.

Ez keyeyê Merwan Bedelî rê serweşîye wazena. Hêrişê vera Şingalî pê destê faşîzmê AKPyî û xîyanetê PDKyî yenê kerdene. PDKyî ra nêbo AKP nêeşkeno hêrişêkê winasênî bikero. PDK û hukmatê Iraqî Şingal qirkerdiş de têrî verdayo, vera şarê êzidîyan sûc kerdo. Dewleta tirke PKK xo rê kena bahane û hêrişê Şingalî kena. La ê zî zanenê ke PKKyî Şingalî ra vejîyayo. Êyê ke hêriş vera înan yeno kerdene êzidî yê. Êzidîyî têna wazenê xo îdare bikerê. Ê sey têgêrayîşê cinîyan amade yê ke pawitişê komelê êzidîyan bikerê. Şarê êzidîyan çi qerar bido ma paştî danê ci.''