Tecrîdo giran ê vera Rayberê Şarê Kurdî Abdullah Ocalanî û tepişteyanê bînan ê Zîndanê Îmraliyî Omer Hayrî Konar, Hamîlî Yildirim û Veysî Aktaş bi serran o dewam keno. Rixmê xîretanê avûkatan û rayaumûmîye zî wextêkê dergî ra nata Ocalanî ra xeberêke nêna girewtene.

Avûkat Burhan Artayî tecrîdê Îmraliyî û zîndananê bînan ê Tirkîya ercna.

Avûkat Artayî îfade kerd ke pêvînayîşê tepişte û hukmwerdeyan heq o û vat: ''Zîndanê Îmraliyî zîndano winasên o ke tede îmkanê têkilîye çin ê. Nê zîndanî de qanûnê heqanê têkilîye yenê binpaykerdene. Astengkerdişê pêvînayîşan birêka sîyasî ya. Serrêke a têkilîya fîzîkî ya bi Zîndanê Îmraliyî nêameye kerdene. Tewr peyêne keyeyan bi telefonî tepişteyanê Zîndanê Îmraliyî de qisey kerdbi. Welatanê huqûqî de ganî dezgehêk nê pêvînayîşan kontrol bikero. Seba teqîbê caardişê heqanê tepişteyan no şert o. Bika dezgehê mîyanneteweyî, keye û avûkatî nêeşkenê xo biresnê Îmrali. No zî qanûnî nîyo.

Ganî dewlete bi xo nê pêvînayîşan bida kerdene. Seba qedexeyê pêvînayîşî cezayê dîsîplînî sey bahane yenê mojnayene la derheqê nê cezayan de agahîye nêna dayene.Buroyê Huqûqî yê Asrinî baroyanê Tirkîya ra waşt de seba pêvînayîşê Îmraliyî têbigêrê la têna Baroyê Amedî cewab da ney. Verî ke erey bo ganî Îmrali kontrolî ra bêro akerdene. Seba ney zî xîretê ma estê. seba qedînayîşê tecrîdê vera Rayberê Şarê Kurdî Abdullah Ocalanî û tepişteyanê bînan rêxistinê komelê sivîlî û rêxistinê huqûqî ganî zêdêr têbigêrê.''