Endama Koordînasyonê PAJKî Ronahî Serhat serrgêra ci ya 9. de Qirkerdişê Parisî ercna. Qiseykerdişê Ronahî Serhat ra beşêk wina yo:

''Ez verî Sakîne Cansiz, Fîdane Dogan û Leyla Şaylemez bi rêzdarî yad kena û nê qirkerdişî şermezar kena. Qirkerdişê Parisî  û qirkerdişê bînî yê vera kurdan netîceya çaresernêkerdişê meseleya kurdan a. Qirkerdişê Parisî rîyo raştikên ê Ewropa eşkera kerd. No qirkerdiş bi fermanê Erdoganî hetê MÎTî ra ame kerdene. Dewleta Fransa zî no qirkerdiş mîyan kerd. Wextê Qirkerdişê Parisî de prosesê çareserîye estbi Dewlete bi nê hawayî mesajê 'Ya şima yenê qetilkerdene yan zî teslîm benê' da.

Hedefkerdişê embaze Sakîne hedefkerdişê Rayberîye bi. Ewropa xora raştîye zanayêne la qestî ra vengê xo nêkerd. Bi nê hawayî verê qirkerdişanê dewlete akerd. Dewletanê mîyanneteweyîyan nefretê dewleta tirke pê polîtîkayanê xo geş kerd. Fransa hema verî de delîlê qirkerdişî zî arê nêdayî, qirkerdiş tim mîyan kerd. La kurdî û dostê înan qetî do peyê na dewa meverdê. Fransa eke biwaştêne eşkayêne derheqê Hakîn Fîdan, Erdogan û dewleta tirke de bire bigêra. Yewîya Ewropa zî pê bêvengîya xo bîye hemkara nê qirkerdişî.

Cînayetê Olof Palmeyî de zî sûc erzîya milê kurdan ser. Dewleta tirke û dewletê Ewropa kurdan rê qirkerdiş ferz kenê. Kurdî û têgêrayîşê ma heqê xo yê pawitişî anê ca. Kesê ke naye ra kurdan rê vanê terorîst namerd ê. Kurdî estê û do estbê. Rayberîya ma semedo ke na raştîye temsîl kena maruzê komployî mend. Ewro vera gerîlayan çeka kîmyewîye şuxilîyena. Sere de Fransa û Almanya ganî dewletê Ewropa hînî mebê hemkarê nê sûcî û raştîye bîyarê ziwan. Hînî nêzdîbîyayîşê bi meseleya kurdan de wextê vurîyayîşanê pîlan ameyo. Vera huqûq û merdimîye yo ke Rayberîya ma binê tecrîdî de ya. Sîstemê Îmraliyî binê mesuldarîya CPTyî de ya. Ganî Konseya Ewropa mesuldarîya xo bîyara ca.

Serra 2021î de ma şer û xoverdayîşêko pîl kerd. Ma nêverda ke dişmen Herêmanê Pawitişî yê Medya îşxal bikero. Polîtîkayê qirkerdişî asta girînge de ameyî pûçkerdene. Ma pê Serkewtişê Garê dest pê serre kerdbi. Ney dişmen tarûmar kerd. Dişmenî 23ê nîsane de hêrişê hîrayî dayî destpêkerdene la gerîlayî hê xoverdayîşêkê pîlî kenê. Vera hêrişanê kîmyewîyan û barbaran gerîlayî hê wezîfeyê xo anê ca. Çar parçeyanê Kurdîstanî de şar, cinîyî vera îxanetê PDKyî têkoşîn kenê la no qîm nêkeno.

YJA-Starî mîyanê serre de bi desan çalakîyî kerdî, asta rayberîye de tewrê hemleyanê şorişgêran bi. Gerîlayanê YJA-Starî vera teknîkê dişmenî bêmabên xo verda. Hema zî xoverdayîşê ma dewam keno. Labelê ganî bingeyê stratejîya şerê şarî yê şorişgêrî de têkoşîn bêro kerdene. No şer şerê her wextî ra cîya yo û do qederê ma dîyar bikero. Serkewtişê nê şerî do peynîya rejîmê AKP-MHPyî bîyaro. Bi taybetî vera îxanetê PDKyî û hêrişanê îşxalî yê AKP-MHPyî serra 2022î do biba serra têkoşînê bitesîrî.''