Dewleta tirke ya îşxalkere vizêr saete 14.00 de qezaya Xanesorî de pê SÎHAyan hêrişê wesayîtêkê sivîlan kerd. Hêriş de Hemserekê Heyetê Îdareyî yê Şingalî Merwan Bedel şehîd bi û 2 domanê ci hetê şarê herême ra ameyî xelisnayene. 

Şarê Xanesorî vera hêrişî nêrazîbîyayîşê xo mojna.

Roniştox Xidir Hemetî pare kerd ke paştdayîşê dewleta Iraqî ra nêbîyêne dewleta tirke nêeşkayêne wina rehet hêriş bikera û vat: ''Merwanî wexto ke domanî xo berdêne dibsitane dewleta tirke hêriş kerd. Dewleta tirke tim hêrişê êzidîyan kena la ma zî tim xo ver danê. No hêriş dewamê Peymana 9ê Teşrîna Verêne yo. Coka hukmatê Iraqî mesuldarê nê hêrişî yo.''

Zîna Ehmed vat: ''Çira dewleta tirke hende rehet bombayan erzena ma ser? Hukmatê Iraqî sey hertim bêveng o. Eke Iraqî destûr nêdayêne kes nêeşkayêne nê hêrişan bikero. Bêvengîya Iraqî bena sebebê nê hêrişan.''

Selam Hesenî vat: ''Ez salona sporî de bîya. Wexto ke ma veng eşnawit vejîya teber. Ma dî de adir kewto wesayîtêkî ser. Ma cade Merwan berd nêweşxane. Domanan rê çîyêk nêbi labelê Merwan şehîd bi.''