Endamê Konseya Rayberdişî ya KCKyî Sabrî Okî derheqê rojdemî de ANFyî qisey kerd.

Şima qerarê binpaykerdişî yê Konseyê Ewropa yo ke derheqê Rayberê Şarê Kurdî Abdullah Ocanî de ame girewtene senî ercnenî?

 Rayber Apo 23 serrî yo Zîndanê Îmraliyî de binê tecrîdî de yo. Sîstemê Îmraliyî hetê hêzanê komplokêran ra ame raameyene û sey dewamê komployî yeno rayraberdene. Komplo xora hetê Amerîka û Ewropa ra ame kerdene. Nê hêzî ewro zî berpirsîyarê sîstemê Îmraliyî yê. Eşkerayo ke rixmê heme hêrişan Îmrali de xoverdayîşo xurt yeno dayene. Hukmatê AKP-MHPyî şexsê Rayber Apoyî de hêrişê têgêrayîş û şar û dostanê ma keno. Îqtîdaro faşîst wazeno kurdan û PKKyî rê çok bido dayene la xoverdayîşê têgêrayîş û şarê ma konseptê çokdayîşî yê înan pûç vete. Badê 7 serran muracatê avûkatanê Rayber Apoyî ameyî destgirewtene.  Gama ke qala kurdan bena herindê huqûqî de tewirê polîtîkî vejîyenê vernî. Ge ge game huqûqî zî yenê eştene. Nika çîyo muhîm oyo ke Komîteya Wezîran a Konseya Ewropa çend şina Tirkîya ser. Komîte wayîrê qerarê Mehkemeya Heqanê Merdiman a Ewropa vejîya. No çîyo ke muhîm o. Ganî no qerar têna qale de nêmano bêro caardene. Eke şarê ma her hetî ra têkoşîn bikero û wayîr Rayber Apoyî bivejîyo, berpirsîyarî mecbur manenê ke game bierzê.

Demanê peyênan de warê mîyanneteweyî de şexsîyetê muhîmî seba ke PKK lîsteya terorî vejîyo û semedê azadîya Rayber Apoyî çalakîyan kenê. Şima nê senî vînenî?

Sere de ez wazena nê kesan ê ke semedê azadîya Rayber Apoyî têgêrenê selam bikerî. Raşta zî tewirêkê tarîxî ramojnenê. Bêşik semedê karanê leyminan ê hêzanê hegemonikî yê mîyanneteweyî PKK gerîya lîsteya terorî. Eke Tirkîya dewleta NATO nêbîyênî PKK qetî lîsteya terorî nêkewtêne. Nê hêzî çarenêbîyayîşê meseleya kurdî ra zî berpirsîyar ê. Eşkeray o ke ke eleqeya PKKyî bi terorî çîn a. Nê hêzî zî naye zaf hole zanê. Eke paştîdayîşê NATOyî çînêbîyênî faşîzmê AKP-MHPyî nêeşkayêne vera kurdan wina şer bikero. Rîyê Almanya, Îngîlîstan û Amerîka ra PKK lîsteya terorî de yo. Xora çekê ke dewleta tirke vera kurdan şuxulnena zî nê welatan dayê ci. Gerîlayanê PKKyî vera DAÎŞî bedelê pîlî dayî û şar înan ra xelisna. Komelê Amerîka û Ewropa ewro xeyrê PKKyî asayîş de yê. Welatê Ewropa se vanê wa vajê ewro PKK wîjdanê merdimîye de cayê xo girewto. Paştdayîşê rayapêroyî yê Ewropa naye eşkera ramojneno. Welatê Ewropa zî zaf hole zanê ke terorîsto esasî îqtîdarê dewleta tirke yo. Rayber Apo tim wazeno bi rayîrê demokrasîyî meseleya kurdî çareser bikero. Nêrazîbîyayîşê komelê Ewropa yê vera tecrîd û qedexeyê PKKyî muhîm ê û do verê averşîyayîşan abikerê.

Rewşa peyêne ya faşîzmê AKP-MHPyî şima senî ercnenê?

AKP nizdê 20 serran o ke îqtîdar de yo û 5 serrî yo pîya bi MHPyî koalîsyonê ci esto. Xora yeno zanayene ke AKP sey projeyêkî bi îqtîdar. Pê îslamê nermî, projeyê pîlî yê Rojhilate Mîyanênî kewt dewre la peyra mîyanê prosesî de xeyalê Osmanîyî vejîyayî werte. Nê îqtîdarî heme îmkanê xo semedê qedînayîşê PKKyî fînayî şuxulnayî la rixmê heme hêrişan waştişê ci nêame caardene û planê ci serûbin bîyî. Ewro poblemê nê îqtîdarî bi heme dinya estê. Pê hêrişanê îşxalî kewt tengayî û têgêrayîşê azadîye peynîya ci arde. Pê qala kilme faşîzmê AKP-MHPyî bin kewt. Ganî nika cepheyêko xurt ê demokrasî û muxalefetî rolê xo kay bikero. Na babete de tewirê HDPyî zaf muhîm a. CHP zî ganî hinî qerardar gaman bierzo ke verê Tirkîya bêro akerdene. Wextê îqtîdarî bîyo de, o têna hela peyêne ciwîyeno. Nika ganî hetê çep,antî faşîst, hêzê demokrasîyî têkoşîn bikerê ke îqtîdarî bidê war.

Vera gerîlayan çekê kîmyewîyî yenê şuxulnayene. Nêrazbîyayîşanê vera nê hêrişan şima senî ercnenê?

Îqtîdaro faşîst bi heme hêzê xo hêrişê gerîlayan keno. Hesabê înan o bi ke demo kilm de ser bikewê la sey waştişê înan nêbi. Waranê Heftanîn, Mam Reşo, Zendûra, Garê, Avaşîn, Werxelê de raştê xoverdayîşê xurtî yê gerîlayan ameyî. Cayanê ke dekewtî de mendê. Bi na wesîla ez xoverdayîşê gerîlayan zî selam kena. Embazê ke pê çekanê kîmyewîyan şehîd bîyî înan zî bi hurmet yad kena. Vera xoverdayîşê gerîlayan bêçare mendî. Seba ke nêeşkayî gerîlayan çekê kîmyewîyî yê ke her cayê dinya de qedexe yê şuxulnayî. Dezgehê mîyanneteweyî vera  çekanê kîmyewîyan hîsgêr ê la gama ke qala kurdan û Kurdîstanî bena reyna bêveng ê. Seba ke welato ke sûc keno endamê NATOyî yo êyê ke yenê kiştene kurd ê çew vengê xo nêvejeno. Rixmo ke şarê ma û dostê ma bi çalakîyan na bebete kenê rojdem hema bêvengîye dewam kena. Ganî çalakîyî zafêr bêrê kerdene ke dewleta tirke bêro teşîrkerdene. Wa her cade rîyê leymin ê Tirkîya bêro ramojnayene û wa her kes bieşnawo ke a sûcê şerî kena.

PDK qey vera şarê xo paştî dano dewleta tirke û vera îşxalî tewirê şar û partîyanê sîyasîyan ê Başûrî şima senî ercnenê?

Ercnayîşê tarîx roje ma ya, roja ma ameyox a ercnayîşêko raşto. Qet çîyêk çew nêeşkeno têna goreyê ewro bîgigo dest. Dewleta tirke tarîxî ra dişmenîya kurdan kena. Birayê Şêx Amet Barzanî yo pîl Şêx Selam 1914 de hetê dewleta Osmanîyî ra ame îdamkerdene. Dewleta tirke Şêx Ahmet Barzanî zî 1933 de teslîmê Îranî kerd û dewleta îranî zî o Musul de eşt zîndan.  Hema çend rojî verê cu Wezîrê Pawitişî yê AKPyî Hulusî Akarî meclîsê tirkî de vat ''Kurdîstan çîn o''. Nayî ser o ey ra ame perskerdene ke  ''Başûrê Kurdîstanî zî çîn o'' ey zî vat ''ê Başûrê Kurdîstanî zî çîn o''. Berpirsîyarê PDKyî Şêx Selamo ke ame îdamkerdene ra vatişê Hulusî Akarî rê çi vanê ez teqdîrê şarê ma rê verdena. Dewleta tirke vana wa PKK Rojawan ra vejîyo PDK zî eynî sey ci vano. Çew vano qey dewleta tirke qet Başûr îşxal nêkerdo û îdamî nêkerdî. Hisgêrîya şarê Başûrî ya semedê na babete muhîm a. Partîyê sîyasîyî û şarê ma yê Başûrî vera îşxalî vejîyenê. Dewleta tirke bîlasebeb çeteyan weye nêkena. Eke vera PKKyî ser bikewtêne hêrişê Hewlêr û Kurkûkî zî kerdêne. Şarê ma ganî nê tehlukeyî bivîno wayîrê xoverdayîşê gerîlayan vejîyo. Ganî roşnvîr, rêxistin, şexsîyet û şarê ma yê ercîyaye yê Başûrî wayîrê ercanê Kurdîstanî vejîyê û têkoşînî pîlêr bikerê.