Ma Fermandaranê Qerargehê Merkezî yê YJA-Starî ra Şerda Mazlûm Gabar reyde bi wesîleya serrgêra Qirkerdişê Parisî qala Sakîne Cansiz kerde.

Gabare sere de Sakîne Cansiz, Rojbîne û Ronahî yad kerdî û nê vatî:  ''Helqê têkoşînê azadîye yê cinîyan embaze Sakîne mîyanê partîya ma de morê xo da binê zaf karanê muhîman ê verênan ro. Eke ma wazenê ewroyê têkoşînê azadîye yê cinîyan fam bikerê ganî verê biewnê tarîxî de sebîyo. Destpêkê têkoşînê ma yê azadîye embaze Sara ya. Karekterê embaze Sara yo. Berzeyê azadîye kerd weye, kerd pîl û da vilkerdene.  Rêxistinbîyayîşê yew qefleyê ciwananê Kurdîstanî bi wextî bi pîl. Cinîyê verênê  ke şertanê tewr zehmetan de tewrê ci bîyî çimeyê ma yê hêzî yê. Embaze Sakîne Cansiz zî  tewrê kongreya verêne bîye, vera dişmenî bi vindertişê efsanekî vinderte û ne vera serdestîya camêrdan ne zî verê peydemendişê cinîyan  çirey milê xo çewt nêkerd, verê zulm û bêedaletîye de milê xo çewt nêkerd.

Embaze Sakîneya ke berzeyê azadîye çar leteyanê Kurdîstanî de ramit, Dêrsimî ra dest pê têkoşînî kerd û roja tewrbîyayîşî ra aktîf rol girewt. Roja ke têgêrayîş nas kerd  ra nata dest pê pêrodayîşî kerd.  Bi rika pîle raştîyê ke tira pawer kena pawitî. Waştişê ci o bi ke  cinîyan perwerde bikero ke wa pêro wayîrê heqanê xo vejîyê. Reyna zîndanan de zî vera heme îşkenceyanê dişmenî sereberz xover da.  Têkoşîno destankî da. Embaze Sakînaya ke bi endamîya komîteya merkezî û endamîya ronayîşî ya PKKyî ameyêne muhekemekerdene pawitişo sîyasî kerd. Dayîkanê kurdan nameyê ci da kênayanê xo.  Reyna kesê ke o wext tewrê têkoşînî bîyî nameyê Sakîne girewt. Embazê Sakîne zaf rew kewt nê rayîr, îmtîhananê zehmetan ra ravêrt bîye murîda tewr rinde ya dergahê eşqî.  Raştîya yew cuye û têkoşînî vert meydan ke Rayberîye rê 'hêrişo ke Sakînê rê bi, mi rê bîyo' da vatene.

Tay merdimî estê ke cuya merdiman de hela verêne de zerrîya çewî germine kenê, çew merak keno wazeno bisarisno. Gama ke mi embaze Sara dî mi wina his kerd. Cinîya welatê koyanî mi welatêkê dengizan de nas kerde. Nîsana 98î de warê Rayberîye de pîya bi embazan Nuda û Ferda ameyî kampa ma. Reya diyîne zî kanûna 1999î de kongreya 7. de ma ameyî têhet. Wina germin virar şîye mi ra ke senî ke ma embezê bi serran bê. Prosesê kongre de mi a bineyna nêzdî ra nas kerde. sereberz bî, rind ewnîyeyêne û goreyê ci yew esaletê ci bibi. Mi ser o zaf tesîr kerd. Ge nêzdî ge-ge zî dûrî ra mi aya seyr kerd. Xo ra bawer bî, bi vatiş û tewiranê xo zerrîya mi de rêçê xo verda ke do nêro esternayene. Çew qayîl kerdêne aye goştarî bikero.

Dima ra ma cayê kongre de perwerdeyê kadroyan girewt.  O prosesî de mi embaza Sara reyde zaf rind wext ravêrna. Sporê sibayî mi bi aye hes kerdî, vaşê xo yê verênî mi pîya bi aye arêdayî, seydwanîya sungan ma pîya kerde. Vilîkî ramitibî  û gileyanê daran ra masa viraştbî. Radyo goştarî kerdêne, fikirîyayêne û muneqeşe kerdêne. O wext Ferhat (Osman Ocalan) uca bi û waştêne xeta xo hekîm bikero. Kerdêne ke bitaybetî xeta Rayberîye, cinîya azade û rêxistinîya xosere betal bikero. Embaze Sara zî vera Ferhat û êyê ke sey ey yê ma hîşyar kerdêne û bi zanayîşê azadîye û rika xo têkoşîn kerdêne.

Ez wazena qala yew vîrameyîşê xo bikerê ke çirey mi vîra nêşino. Gama ke ma mektebê kadyoran de notêkê Rayberîye ser o  muneqeşe kerdêne. Ferhat komîsyon bi. Ferhatî vat 'şima yew rew girêdayeyê Rayberîye yê ez rîyê gonîya xo ra di rey pabesteyê ci ya.  Ma çend embazî wiriştî we û vat 'ma nê qebul nêkenê.' Cewabê ey zî tam goreyê ci bi, 'Şima biteqê zî o birayê min o.' Ma cemidyayî mendî.  Embaze Sara resayê îmdadê ma. Bê heqê qale girewtişî wiriştî we û vat 'ti nêeşeknê îradeyê nê ciwanan bişiknê, rexneyê înan heqdar ê.' Ferhatî qala aye birnaye û vat 'xora problemê to yê zaf îradebîyayîş esto'. Embaze Sara vat 'eke Mazlûmî, Kemalî tîya de bê' ti nêeşkayêne wina qale bikerî. Ferhatî goş nêda aye û lezabeze perwerde qedîna vejîya teber. Embaze Sara peyra kewte ey dima verê şikeftê Dola Koke de qîrayî ey ser. Ferhat remayêne. Embaze Sara ne xo ne zî embazê xo dayêne eciqnayene. Coka tim hedef bî.

Rixmê heme zehmetîyan tim bi têkoşînî sereberz bî û rîyê ci rika ci eysayêne. Belka coka hende ameyêne heskerdene. Tilsimê ci belka no bi.  Ez tewr zaf embeze Sara ra musaya çew senî beno PKKyij. Mi aye de dî ke cinîya PKKyîje senî rinda. Ez aye ra heskerdişê herre, welatî, koyan, cuya, cinîye musa ya. A PKKyîja raştkîne bî. Wextê ronayîşî ra heta peynî tim paşta aye PKKyî ra pêt bî. Aye sînorê xo rijnaybî. Dima ra mi tim aya teqîp kerd. Ge ge ma ameyî têhet.

Tewr peynî Gabar de vewre varayêne gama ke ma kolî arêdayene radyo ra mi eşnawit ke embeze Sara Paris de ameya kiştene.  A roja serdin a zimistanî de zerrîya mi bîye sey cayê şewatî. Pê kiştişî kam eşkeno na rindîye, na cinîya azade çîn bikero. Rixmo ke hende serrî ravêrtî zerrîya ma hema vêşena. A bi heme esalet û rindîya xo tim cayê ma de ya. Êyê ke vanê qey pê kiştişî eşkenê embeze Sara çîn bikerê xelitîyene.

Rayberîye kiştişê embeze Sakîne sey Qirkerdişê Dêrsimî yê diyînî name keno. Bi Qirkerdişê Dêrismî kultur, ehleq, ercê şarêkî û merdimê rindî ameyî hedefkerdene. Vervejîyayîşê sereberz, xoverdayox ê vera zaliman  raştê qirkerdişî ameyî. Pê qederê şarêkî ame kaykerdene. Polîtîkayê eynî qirkerdişî bi serran ra dima bajarê Parisî yê Ewropa de embaze Sara ameye hedefkerdene. Manayê tarîxîkî û aktuel ê nê qirkerdişî estê. Embaze Sakîne Dêrsimije bî û cinîyan têkoşer bî. Na merdima rinde bi raştîya Rayberîye û PKKyî dahîna rindêr bibî. Cinîya azada ke Rayberîye afernaye ameye hedekerdene. Na cinîye ra tersayî. Ma sey YJA Starî vatbi ke ma do hesabê nê qirkerdişî bipersê. Ê do hesabê qirkerdişî zaf giran bidê.''