Şerwana erebe Amara Cûdî Şorişê Rojawanî ra dima pê tesîrê têgêrayîşê azadîye tewra PKKyî bîye. Amara Cûdî derheqê tewrbîyayîşê xo de ANFyî rê qisey kerd û qala hîkayeya xo kerde.

Amara Cûdî serra 2016î de tewrê têkoşînê azadîye bena. Amara vat: ''Ma mîyanê komelî de nameyê kurdan û Kurdîstanî zaf nêeşnawitbî. Şorişê Rojawanî de bi taybetê şerê Kobanê de mi şerwanê azadîye şinasnayî. Minbic hetê DAÎŞî ra amebi îşxalkerdene, şerwanê YPG û YPJyî seba şerî ameybî Minbic. Mi uca de embazî şinasnayî. 

Wexto ke mi embazî dîyî embazîya înan zaf tesîrê mi kerde. Ma ereb bîyî. La reyna zî înan cîyakerîye nêkerde û seba şarê ma zî şer kerd. Mi va ganî ez zî tewra şerê heqî biba. Reyna şerwanan ê  cinîyan zî zaf tesîrê mi kerd. Mi va sey cinîyêka erebe ez zî eşkena şer bikera.

Mi koyî zaf meraq kerdêne. Dima ke ez tewr bîya wextêk şîya koyan. Mi dî ke cuya koyî çinbîyayîşî ra afirîyena. Her çi destê  ma de yo, cuye pê kede yena awankerdene. Bêguman zor û zehmetîyê ci estbîyî labelê vera nê afernayîşî de zor û zehmetî çîyêk nêbî.

Felsefeya Rayberîye wayîra çarçewayêka hîra û xorin a. Caardişê paradîgmaya Rayberîye do cuya komelan de vurnayîşanê pîlan bikero. Sîstemo kapîtalîst seba ke verê paradîgmaya Rayberîye bigêro pêro metod û rayîran ano ca. Rixmê hêrişanê sîstemî zî ganî felsefeya Rayberîye xo biresna zêdêr şaran û rêxistinîye xurt bikera.

Ez bi taybetî venga ciwanan ê ereban dana ke tewrê têkoşînî bibê. Dewleta tirke têna vera kurdan nê vera pêro şaranê Rojhelatê Mîyanênî hêriş û tedayan kena. Ganî ma verê hêrişanê dişmenî bigêrê. Ganî ciwanî ney bivînê û bi xurtî tewrê têkoşînî bibê, ganî ma zêdêr xo ver bidê, verê xo bidê koyan. Eke ma raşta zî şar û welatê xo ra hes kenê, eke ma wazenê welatê xo de bi hawayêkê azadî, têdûştî û rûmetênî biciwîyê ganî ma zêdêr şer bikerê, têkoşîn bikerê.''